અભિધાએ દોટ મૂકી આંધળી.
લક્ષણા છુપાઈ ગઈ ખૂણામાં.
વ્યંજના બિચારી
મોં વકાસી ઊભી.
શોધે આશરો.
નિર્વીર્ય શબ્દ
સિંહાસનભ્રષ્ટ થઈ
બજારના અધિપતિનાં
ચરણ ચૂમે.
વફાદાર ભૃત્ય
કચરાપોતાં કરે.
માલિકને સલામ કરી
પામે બે ટુકડા પુરસ્કાર.

મુંબઈ.

સૌજન્ય : “નિરીક્ષક”, 01 ડિસેમ્બર 2021; પૃ. 03

ઘરની
બહાર
અરધો ફૂટ
જમીન દબાવનારનું
ડિમોલેશન થઈ જાય છે.

એ લોકો
કહે છે
કાશ્મીર
આપણું છે.

સૌજન્ય : “નિરીક્ષક”, 01 ડિસેમ્બર 2021; પૃ. 15

એક હતો રાજા.
એણે
જેની હત્યા કરવી હોય
એને
કોઈ ગુનામાં પકડતો
અને પછી
ફાંસીની સજા
આપી દેતો.

વાર્તા પૂરી. 

સૌજન્ય : “નિરીક્ષક”, 01 ડિસેમ્બર 2021; પૃ. 15