ભગવાન થાવરાણીના એક ગમતા કાવ્યનો અનુવાદ પ્રસ્તુત કરું છું :

દેશ આખાની મહાનદીઓનાં મૂળ

જોવા-શોધવામાં મશગુલ રહ્યો

ગંગોત્રી-યમુનોત્રી-અમરકંટક-તલકાવેરી

સુદૂર ઉત્તરથી માંડીને

મધ્ય ને દક્ષિણ ભારત લગી

પણ ક્યારે ય એવો વિચાર ના આવ્યો

કે મારા પોતાના મલકની નદીઓ –

ભાદર-ઓઝત-શેત્રુંજી ને મધુવંતી

એનાં ય મૂળ છે ક્યાંક –

મારી બહુ નજીકમાં

ભલે ને એ સાવ નાની હોય.

એને જોઇ-શોધી-ખોળી ને 

નમી શકાય છે

પણ…

અને તમે ભલે ગમે તે વિચારો

એક વાતની પૂરી ખાતરી રાખજો

કે હું અહીં 

નદીઓની જ 

વાત કરું છું.

સૌજન્ય : નંદિતાબહેન મુનિની ફેઇસબૂક દીવાલેથી સાદર 

સુવિખ્યાત અમેરિકન કવિ બિલી કોલિન્સના કાવ્ય ‘In the Evening’નો મારો અનુવાદ.

ગુલાબનાં મસ્તક ઝૂકવા લાગે છે.

આખો દિ’ સોનું વીણવામાં મશગુલ મધમાખીને

આરામ કરવા મળે છે એક ષટ્‌કોણ.

આકાશમાં વાદળની નિશાનીઓ,

ત્વરાથી ઊડતાં છેલ્લાં થોડાંક પક્ષી,

ક્ષિતિજ પર જળરંગો.

સફેદ બિલ્લી બેઠી છે ભીંત તરફ તાકીને.

મેદાનમાં અશ્વ ઊભો ઊભો જ નિંદરે છે.

લાકડાના ટેબલ પર મીણબત્તી પેટાવું છું હું.

આસવનો એક વધુ ઘૂંટ લઉં છું.

એક ડુંગળી ને ચપ્પુ લઉં છું હાથમાં.

અને ભૂતકાળ, અને ભવિષ્ય?

બીજું કંઇ નહીં, બે અલગ મહોરાંવાળું એક જ બાળક.

સૌજન્ય : નંદિતાબહેન મુનિની ફેઇસબૂક દીવાલેથી સાદર

અતિપ્રિય કવિ મેરી ઓલિવરના કાવ્ય ‘The Gift’નો મુક્ત અનુવાદ પ્રસ્તુત કરું છું.

*

સ્થિર બન, ઓ હૃદય, ને તું દૃઢ બની જા.

નિતરી ચાલ્યો સમય છો ઘડિયાળમાંથી

ને ચપળ, મગરુબ હતી જે ચાલ તારી

પડી ગઈ ધીમી, તોયે હજુ, જો

ગગન ને ધરતી રહ્યાં તુજને નિહાળી.

તો ધીમા રહેવું પડે, તો પણ અરે તું

કામ કરવા દે હૃદયને ખરું એનું.

એકદા કરિયો હતો જે પ્રેમ 

ઊંડો ને અધીરો

હજુ કર એમ જ. 

વિભુને, વિશ્વને તું 

આભારવશતા જાણવા દે

જાણવા દે કે તને સોગાદ મળી છે.

સૌજન્ય : નંદિતાબહેન મુનિની ફેઇસબૂક દીવાલેથી સાદર