હુકમ છે કે હવે છોડે બધા સ્વચ્છંદ ઉડવાનું
ભલેને હોય પાંખો પણ નહીં પોસાય લગીરે
અમે નક્કી કર્યાં તે ઝાડ ઉપર બેસવું પડશે
અને ટહુકવું પડશે દબાતા સૂરમાં ધીરે
હવે સિવાય ગાયો નોંધ લે સઘળાં પશુઓ પણ
હરે, ફરે, ચરે, પણ ના કરે વિવાદ તેનો તે
નડે કે શીંગડા મારે, પરંતુ ગાય છે માતા
ગણાશે ધર્મદ્રોહી, વાદ લેશે ગાયના જે જે
અમારા રાજમાં પંખી-પશુ-માણસ બધાં સરખાં
પશુપંખી બધા તો દાબમાં રહેશે જ રહેશે પણ
નવી આબોહવામાં ઉછરેલા માણસો પેલા
નહીં ગાંઠે જરા પણ કેમ કે છે આજ બંધારણ
હુકમ ના પાળવાની તો સજા દેખાય ના તેવી
અનાદર જે કરે છે તે અમારા ધ્યાનમાં રહેતા
અમારા સાણસામાં તે બધા સપડાય છે એવા
દશા એ જોઇને ગભરૂ બધા ત્યાંથી સબક લેતા
સૌજન્ય : “નિરીક્ષક” સાપ્તાહિક ડિજિટલ આવૃત્તિ; 19 ઑક્ટોબર 2020; પૃ. 16