ચહેરા ભૂખના ને થાકના જોયા નથી જાતા
કણસતા વૃદ્ધ, રોતાં બાળ આ, જોયાં નથી જાતા
અચાનક ભૂખ માટે રોટલી અદૃશ્ય થઈ છે જ્યાં
શ્રમિકોના દિવસ આ કારમા જોયા નથી જાતા
વતનની યાદ આવી રોજગારી છીનવાયાથી
બન્યા જે તે હવે બેબાકળા જોયા નથી જાતા
કમોતે જે મર્યા એ તો ગયા આ નરકથી છૂટી
મરણની ભીંસમાં આ જીવતા જોયા નથી જાતા
સમયસર જાગવું સરકારનુ લક્ષણ નથી હોતું
શ્રમિકોના ઉપેક્ષિત કાફલા જોયા નથી જાતા
સૌજન્ય : “નિરીક્ષક” − ડિજિટલ આવૃત્તિ; 31 મે 2020