હથેળીમાં રોપ્યો છે ફરફરતો ઝંડો
નિરંતર બગાવતનો.
ઠરીઠામ નહીં થવા દેતા ઉદ્રેકોને
સૂત્રોમાં પરોવી વહેતા મૂકી દઉં છું.
ક્યાં ય પણ, કોઈ પણ
કચડાઈ રહ્યું હોય એની પીડા
ઊંડા કણસાટમાં પલટાઈ
મારી નિરાંતમાં અફળાયા કરે છે.
વરસ પછી વરસ પછી વરસ વિતાવી
આ અહીં પહોંચેલી મારી ઇચ્છાઓ,
કશું પણ ઊલટસૂલટ કરવા
હજી ય તલપાપડ છે.
મારી આંખો જુએ છે
દૃશ્યોપારનાં દૃશ્યો.
પજવતાં અવદૃશ્યોને ડહોળી મૂકતા
આ હાથ હજી થાક્યા નથી.
૭, મુક્તાનંદ સોસાયટી, નર્મદાનગર, જિ. ભરૂચ, ૩૯૨ ૦૧૫.
સૌજન્ય : “નિરીક્ષક”, 16 ડિસેમ્બર 2021; પૃ. 07