પ્રાંત પ્રમાણે બદલાતી,
ગરવી ભાષા ગુજરાતી,
જગતમાં ગર્વથી ફેલાતી
ગરવી ભાષા ગુજરાતી,
સ્વાદ દાદમાં વખણાતી,
ગરવી ભાષા ગુજરાતી,
મા મુખે મીઠાશ લાવતી
ગરવી ભાષા ગુજરાતી,
સંગીતમાં શિરમોર થાતી
ગરવી ભાષા ગુજરાતી,
સામી છાતીએ ટકરાતી
ગરવી ભાષા ગુજરાતી,
ધર્મની ધજા લહેરાવતી
ગરવી ભાષા ગુજરાતી,
‘ભાવુક’ ભાવ દર્શાવતી
ગરવી ભાષા ગુજરાતી.
પ્રકૃતિમાં તું કમાલ કરે છે વસંત,
કેશુડાને માલામાલ કરે છે વસંત,
મળવાની ગુલાબી કેડી ખીલાવી
પ્રેમની ઋતુ ગુલાલ કરે છે વસંત,
મોસમ ફરી નશામાં ચકચૂર બની
યુવાની જેમ ધમાલ કરે છે વસંત,
ડાળીઓમાં વીંટળાઈને વેલાઓની
લચકતી અદા ન્યાલ કરે છે વસંત,
તારી એક બુંદ ઝાકળના સિંચનમાં
‘ભાવુક’ કલમના ફાલ કરે છે વસંત.
ગામની વચ્ચે ગામ જેવું નથી,
નામમાં કયાંય નામ જેવું નથી,
પીડાઓ છે ફક્ત સૌના મુખે
કોઈ હાથમાં બામ જેવું નથી,
લથડે છે ઘણાં રોજ ગરીબીમાં
ઝૂંપડે નશાના જામ જેવું નથી,
મોટા વિદ્વાન સમા છે દેખાવો
દિલમાં ધર્મનું કામ જેવું નથી,
છે શબ્દોની અઢળક મિલકત
‘ભાવુક’ પાસે દામ જેવું નથી.