આવીને ટપ્પ દઈ બેઠાં વિહંગાં …
                  કે જાણે હો વડલાના ટેટા
ડાળીએ ડાળીએ પેઠાં વિહંગાં …
                 કે જાણે હો વડલાના ટેટા.

વડલો તો ઠાઠમાઠ છોડીને બેઠેલો ગરવા જુનાણાંનો જોગી
વડલાને  જોનારા માથું ધુણાવીને બોલે  કે ‘ખુદનો વિજોગી’
ગોતે છે મૂળિયાંના નેઠા વિહંગાં …
              કે જાણે હો વડલાના ટેટા
ડાળીએ ડાળીએ પેઠાં વિહંગાં …
              કે જાણે હો વડલાના ટેટા.

વડલાની એકલતા વગડે પૂજાય, એના ચોગરદમ બાજે રે ડંકા
વડલો જ્યાં બેસે ત્યાં થઈ જાતું દ્વારકા એને શું ઘોઘા કે લંકા ?
ચારધામ બારધામ હેઠાં વિહંગાં …
                   કે જાણે હો વડલાના ટેટા
ડાળીએ ડાળીએ પેઠાં વિહંગાં …
                  કે જાણે હો વડલાના ટેટા.

એક દિન થાકેલાપાકેલા, એકલડા પંખીએ પૂછ્યું કે ‘આવું ?’
વડલાએ હામી ભરી ત્યાં તો રોજરોજ પૂછે કે ‘બીજાને લાવું ?’
કરતાં સન્નાટાને એઠાં વિહંગાં …
                   કે જાણે હો વડલાના ટેટા
ડાળીએ ડાળીએ પેઠાં વિહંગાં …
                  કે જાણે હો વડલાના ટેટા.

પાંખો ખંખેરીને બેઠેલા સંતોની વડલામાં મંડળીઓ જામે
એકી અવાજે સૌ ફતવો કાઢે કે ભૈ પાંખો સંકેલે તે પામે
બેઠાં તે પહોંચી ગ્યાં ઠેઠા વિહંગાં …
                કે જાણે હો વડલાના ટેટા
ડાળીએ ડાળીએ પેઠાં વિહંગાં …
              કે જાણે હો વડલાના ટેટા.

સૌજન્ય : “એતદ્દ” : 233; જાન્યુઆરી-માર્ચ 2022; પૃ. 08

બુલંદીથી અડીખમ મન વિશે વિસ્તારથી કહેજો,
ને વલ્કલ, ચાખડી, મુંડન વિશે વિસ્તારથી કહેજો.

પ્રથમ ફાંસી ચડેલા પુત્રના ફોટા તરફ જોઈ
પછી લાલન અને પાલન વિશે વિસ્તારથી કહેજો.

પ્રસુતાના અકાળે મોત પર છાપાં ભરાશે પણ
કોઈ એ બાળના અનશન વિશે વિસ્તારથી કહેજો.

ગળે અટકીને બેઠું છે, કર્યું છે જ્યારથી સેવન
ધર્માદાના એ રાશન વિશે વિસ્તારથી કહેજો.

ખબરપત્રી ધીમેથી પૂછશે 'તૂટી ગયાં કે શું?'
તમે ટટ્ટાર થઈ કંપન વિશે વિસ્તારથી કહેજો.

કહી દેશો નહિ પથરાળ રસ્તો કઈ રીતે કાપ્યો,
પરંતુ જર્જરિત વાહન વિશે વિસ્તારથી કહેજો.

કથા કહેશે સ્વયં દળદાર પુસ્તક પણ તમે મિત્રો,
કલમના આખરી નર્તન વિશે વિસ્તારથી કહેજો.

સોસો મણ લોહી સીંચાશે
માટીમાં માટી ગુંદાશે
શિલાલેખ સંઘરશે જિદ્દી રજવાડાની ભૂલ,
કે ઊગશે રાતા સૂરજફૂલ …
કે ઊગશે રાતા સૂરજફૂલ …

ઢોલ અને રણશીંગા ગાજે
કાળ ડાકલાં ડમડમ બાજે
દસદસ સામે એકલ બાઝે
એને રાતા અચકન છાજે
રેતીમાં રોળાતી વીરના આંતરડાની ઝૂલ
કે ઊગશે રાતા સૂરજફૂલ…
કે ઊગશે રાતા સૂરજફૂલ…

ટીલડી ને ઝાંઝરિયા રઝળે
ચક્કરડી ને ગરિયા રઝળે
મેડી રઝળે, ફળિયાં રઝળે
મોભ, કરા ને નળિયાં રઝળે
સોનલવરણા સૂરજમુખીની મોલાતું થઈ ડૂલ
કે ઊગશે રાતા સૂરજફૂલ…
કે ઊગશે રાતા સૂરજફૂલ…

જાહ રે તારા પાયા ગળશે
જાજા રે આંતરડી કળશે
મોલ-બગીચા ભડકે બળશે
જો જે મારા શરાપ ફળશે
દુબળાને કનડીને તે તો ખોયું તારું મૂલ
કે ઊગશે રાતા સૂરજફૂલ…
કે ઊગશે રાતા સૂરજફૂલ…