ફરી દીવા, ફરી સરઘસ જમુરા 'ઓમ શાંતિ' બોલ,
તું જોયા કર બધા ફારસ જમુરા 'ઓમ શાંતિ' બોલ.
લઈ અંધારનું ખંજર કરી ગઈ રાત કારી ઘા,
ફફડતું, ધ્રુજતું ફાનસ જમુરા 'ઓમ શાંતિ' બોલ.
ભલે ઝંડા ઉપાડે ને, ભલે ડંડા ઉપાડે પણ
નથી જીવતો અસલ માણસ જમુરા 'ઓમ શાંતિ' બોલ.
નથી લોહી ઉકળતું કે હવે આંસુ નથી વહેતાં,
ઉપરથી જીભની આળસ જમુરા 'ઓમ શાંતિ' બોલ.
રગેરગ લ્હાય બળશે ને પછી જાતે ઠરી જાશે,
કકળશે વાંઝિયા ખૂન્નસ જમુરા 'ઓમ શાંતિ' બોલ.
કલમને લાખ સમજાવી પરંતુ ચૂપ નથી મરતી,
કરી બેઠી ફરી સાહસ જમુરા 'ઓમ શાંતિ' બોલ.
લખી શકતા, કહી શકતા, મરી શકતા -એ પેઢીના
છે 'પારુલ' આખરી વારસ જમુરા 'ઓમ શાંતિ' બોલ.