માર્ગમાં ભૂવો પડ્યો છે,
આભથી ચૂવો પડ્યો છે.
ડૂબવાની શક્યતા છે,
વ્હાણનો ખૂવો પડ્યો છે.
મોતને ચાલો કહીએ,
શ્વાસનો પડઘો પડ્યો છે.
એ જ છે અફવા નગરમાં,
આયનો જૂઠો પડ્યો છે!
મેં લખેલી કૈં ગઝલનો,
વાટમાં ડૂચો પડ્યો છે.
ગોળધાણાં વ્હેંચ ‘નિર્મન’,
તર્ક પણ ઊંણો પડ્યો છે.
07.11.2018
—
e.mail : daveparesh1959@gmail.com
આપણી વચ્ચે સમાંતર શું છે ?
દગ દિશા ને આ દિશાંતર શું છે?
માર્ગ સઘળા ઊમટ્યાં મારામાં,
પગરખાંનું આ સ્થળાંતર શું છે?
આપણે ટક ટક ટકોરા દેશું,
એ જ છે વિસ્મય અવાંતર શું છે?
મેં કહ્યું ને તેં વખોડ્યું એમાં,
મતથી ભારેખમ મતાંતર શું છે?
લ્યો બરફ થઈ ઓગળ્યું ‘નિર્મન’,
પાણીનું બીજું રૂપાંતર શું છે?
09.06.2021
—
e.mail : daveparesh1959@gmail.com
તત્ત્વનું ટાંચણ મને આપો,
તથ્ય ને તારણ મને આપો.
હું કરું પીડાનું પારાયણ,
કોઈ સમજુ જણ મને આપો.
થાય તો એવી દુવા આપો,
જળકમળની ક્ષણ મને આપો.
નાભિમાં હુલસે કમળ રાતું,
એટલું ઘારણ મને આપો.
કીમિયો એવો મને આપો,
ઝેરનું મારણ મને આપો.
ખેસવે છે પગ બધાં મારો,
કોઈ અંગદ ક્ષણ મને આપો.
કંઠ સૂકાઈ જશે મારો,
શબ્દનું ધાવણ મને આપો.
ક્રોંચ વિંધાયો વળી પાછો,
અન્ય રામાયણ મને આપો.
હું ગઝલકુંવર વરું એવો,
દીવડો નામણ મને આપો.
કાફલો ચાલ્યો ગયો ‘નિર્મન’,
ધૂળ ને રજકણ મને આપો.
05.06.2021
e.mail : daveparesh1959@gmail.com