ચપટી વગાડતાં જ ચોખા ખર્યા, ખર્યું તાબોટા પાડતા જ કંકુ!
ઘંટનાદો ખીણ મહીં ખૂંપી ગયા છતાંય ટેકરીઓ પર તણાયા તંબુ;
આભેથી મીઠું મીઠું મલક્યા કરે છે, મારી સામે મઝાનું, ત્રિશંકુ!
ખેંચી-ખેંચીને પછી વાળી-વાળીને કરી જીભનીય ખમતીધર ખાંડવી,
બાજઠ પર લોટો ને લોટામાં શ્રીફળ ને શ્રીફળ પર માયાવી માંડવી;
ડોળીમાં બેસીને આવેલાં દડબાંઓ ખાટેથી પાટે ને પાટેથી ખાટે – જેમ પરસોત્તમ મહિનાના પંગુ!
આભેથી મીઠું મીઠું મલક્યા કરે છે, મારી સામે મઝાનું, ત્રિશંકુ!
ગામને તળાવ-'છાબ', થોક-થોક પાનફૂટી વચ્ચાળે રમતી જળકૂકડીઓ મૂંગી,
કાંઠે, 'ગફ્ફાર'ના લક્કડ-ગરાજમાં, રબ્બરના ટાયરને ગજગજ ફુલાવતી પૂંગી;
સાધુનું વાણિયામાં- વાણિયાનું સાધુમાં- સહુનું નવાણિયામાં- થાતાં રૂપાંતર, હું કંપું!
આભેથી મીઠું મીઠું મલક્યા કરે છે, મારી સામે મઝાનું, ત્રિશંકુ!
4/4/2013
છાબ તળાવ : કિંવદંતિ મુજબ, સિદ્ધરાજ જયસિંહના જમાનામાં વિશાળ સૈન્યના સૈનિકો દ્વારા માત્ર એક એક છાબ માટી ઉલેચવાથી ઉત્પન્ન થયેલું દાહોદ નગરનું તળાવ.
પાનફૂટી : પાણી બગાડનાર એક જાતની વનસ્પતિ
ગફ્ફાર : ક્ષમાશીલ, ઈશ્વર
પૂંગી : વાંસળી, જાદુગરની મોરલી
નવાણિયું : બોલ્યા વિના સહન કરનાર; વાંક વિનાનું; નવાણિયું કુટાવું = નિર્દોષ માર્યું જવું.