જે Aparna Anekvarnaનાં મને બહુ ગમતાં કાવ્યો પૈકી એકનો અનુવાદ પ્રસ્તુત કરું છું.

એક નિરંતર ઉત્સવ

ધીમે ધીમે બજાવાતા રબાબ જેવો

જેને કોઇ વિચારલુપ્તતામાં વગાડી રહ્યું હોય, 

બસ પોતાના માટે જ :

જાણે કોઇને સંભળાવવાથી એ મલિન થઇ જશે

કોઇ સાક્ષી હશે તો જાણે એનું જાદુ છિનવાઇ જશે

જાણે કે વર્ષોથી કોઇ કંઇ બોલ્યું જ ના હોય –

મોં ખોલે તો પણ અવાજ નીકળે નહીં

કંઠનું કંપન, આરોહ-અવરોહ, બધું નકામું.

કલાદીર્ઘા ભૂંસાઇ જાય મનમાંથી,

વિવેચકોની સ્મૃતિ માત્ર ઊડી જાય –

એ જ સાથી બને જે  ભીતર આવે તો જૂતાં ઉતારીને.

એક કણ જેટલું બહાર પણ મંજૂર નહીં …

બસ રંગો ઉતરે નવા નવા,

એક પુલ બંધાય આત્માથી પીંછી સુધી.

એટલું જ બોલવાનું – 

આવશ્યકને પણ ગાળી નાખ્યા પછી જેટલું બચતું હોય.

ચાલો મન,

ધીરે ધીરે ગાયતોંડે બની જઇએ.

(ચિત્ર : વી.એસ. ગાયતોંડે)

સૌજન્ય : નંદિતાબહેન મુનિની ફેઇસબૂક દીવાલેથી સાદર

જપાની કવિ શોતેત્સુ (1318-1459)ના બે કાવ્યનો અનુવાદ પ્રસ્તુત કરું છું.

•

અંધારી રાત્રિમાં વીજળી

મારું હૈયું

સદાની માફક 

અંધારું જ છે;

મારા માટે નથી

કોઈ અન્ય માટે છે

આ રાતની વીજળી.

•

વીજ

રાત્રિના અંધકારમાં

કોને કહીશ હું

મારા મનમાં જે છે તે?

અચાનક વાદળમાં હલચલ-

શરદ ઋતુનો વીજઝબકાર.

•

સૌજન્ય નંદિતાબહેન મુનિની ફેઇસબૂક દીવાલેથી સાદર

આજે (10 ઑક્ટોબર 2023) ફરીથી અમેરિકન કવિ જેમ્સ ક્રૂઝના એક કાવ્ય ‘Say Yes’નો મારો અનુવાદ; આજે માનસિક સ્વાસ્થ્ય દિન નિમિત્તે ખાસ. 

અનુવાદની મંજૂરી આપવા માટે James Crewsની આભારી છું. એમનાં અન્ય કાવ્યો jamescrews.net પર વાંચી શકાશે. 

°

ઘરની બહાર જવા માટે તમે પહેરો છો એ ચામડાના સેન્ડલને સ્વીકારો.

હાથ પર પડતા તડકાને વધાવી લો.

અરે, મચ્છરના ડંખથી ઊપસી આવીને તમને બોલાવતી ગુલાબી ફોલ્લીને હા બોલો.

હા કહો, ઘર પાછળના કાયમી અંધારિયા ખૂણે 

ભૂલાઈ ગયેલા, ચિરાયેલા ભૂરા પ્લાસ્ટિક વચ્ચેથી

ઊગી નીકળેલા જંગલી ફૂલછોડના ઝુંડને.

જે અંધકારમાં તમે વધુ ને વધુ

ખૂંપતા જાઓ છો

એ જ અંધકારમાં ચમકી રહેલાં ઝીણાં ગુલાબી પુષ્પોને હા કહો, 

જેથી એમણે આપેલું વચન તમને મળી શકે :

હા, એ કહે છે – હા, તમને પણ

પ્રકાશ દુર્લભ હોય એવી જગ્યાઓમાં

ખીલવાના રસ્તા મળી રહેશે.