કયારેય પણ ન મારા જીવનમાં તમે હતાં
ને તો ય મારા ચૌદે ભુવનમા તમે હતાં
ખુલ્લા રહે યા બંધ લગારે ફરક નથી
સપનાંની જેમ મારા નયનમાં તમે હતાં
મળતા રહ્યા છીએ છતાંયે આપણે સદા
ધરતી ઉપર હતો હું ગગનમાં તમે હતાં
હું બોલતો હતો એ હતો મારો ભ્રમ નર્યો
આદિથી અંત મારા કથનમા તમે હતાં
કેવી નવાઈ તોય તમે ક્યાં ભીના થયાં
દિનરાત મારા અશ્રુવહનમાં તમે હતાં,
તમને નથી નિહાળ્યાં નથી જાણ્યાં તોય શું
ઈશ્વરની જેમ મારા નમનમાં તમે હતાં
સાહિલ ગજબનો મેળ મળ્યો કેવો આપણો
હું જાગતો હતો ને સપનમાં તમે હતાં
નીસા 3/15, દયાનંદ નગર, રાજકોટ 360 002