કહેવાય છે કે
એ ય જન્મે હતો ગુજરાતી
જન્મ્યો,'તો દાહોદમાં,
તેથી હદ-સરહદ આંકવામાં માહિર!
સાદો ઇન્સાન, શરાબસુંદરીથી દૂર
કુરાનની નકલો જાતે કરતો, વેચતો
પાક્કો નમાજી એવો જ પાક્કો નફરતી!
ઉપનિષદના અનુવાદ કરતા સગા ભાઈનું ગળું કાપતાં અચકાતો નહીં!
બાપનેય કેદખાને ધકેલી દે!
એને તાજમહાલની સામે જોવું ગમતું જ નહીં!
સીદીસૈયદની ચોથી જાળી પૂરી કરવા જ દીધી નહીં!
એના દરબારમાં નથી હોતાં નવરત્નો
નથી હોતા હાજરજવાબી કાન ખેંચતા બિરબલો!
એના કાન પાકી જાય છે તાનસેનનું નામ સાંભળતાં જ!
એની સંસદ ગાજતી હોય છે કેવળ ધર્મધુરંધર મૌલવીઓથી!
એની નામના છે સર્પસત્રવાળા જન્મેજય જેવી
મુસલમાન સુધ્ધાં જવલ્લે જ રાખે નામ એનું !
કયામત સુધી ભટકતી એની રૂહ
હજુય ઝપટમાં લઈ લે છે ભલભલાને.
ઝપટમાં આવી ગ્યો’તો હિટલર!
ઝપટમાં આવી ગ્યા છે ઇઝરાયેલના યહૂદીઓ!
એ પ્રગટ થતો જ રહે છે નામ બદલીને
સમયે-સમયે, ધર્મે-ધર્મે …
તાજમહાલના બંધ કમરા નહીં
ખોલવાં પડશે આપણે આપણા હૃદયનાં કમાડ
ઝાંખીને જોવું પડશે છેક અંદર લગી
ક્યાંક રંગ બદલીને, ઘૂસી તો નથી ગયોને
ઔરંગઝેબ,આપણી અંદર ?
Email : bharatmehta864@gmail.com
સૌજન્ય : “નિરીક્ષક”, 01 જૂન 2022; પૃ. 04