અરર … આ શું?
કીડીઓ ટપોટપ મરી રહી છે,
કંઈ કેટલી ય આઈ.સી.યુ.માં છે.
એનાથી લાખો-કરોડો
દૂરસંચારની અફવાઓ સાથે અથડાતાં
મૂર્છિત થઈ છે.
એમાંની કેટલીક દિશાહીન થઈ છે.
એને લાગી છે લ્હાય પેટમાં.
એને ઠારવાનું તો દૂર
આ
અસહ્ય યાતનાઓ વચ્ચે
એની કોઈ ખરખબરે ય લેતું નથી.
બધાં છૂપાઈ બેઠાં છે બિલમાં.
કેટલાંક ઝીલમાં
એ બધાં કાને મૂંગાં
મુખે આંધળાં
અને
આંખે બહેરાં થયાં છે,
હવે એનો કોઈ ઈલાજ નથી.
ભૂખ અને મોત વચ્ચે
કીડીઓ ઝઝૂમી રહી છે, એકલી.
સૌજન્ય : “નિરીક્ષક” − ડિજિટલ આવૃત્તિ; 24 ઍપ્રિલ 2020