કાવ્યકૂકીઝ
વરસાદ અમને ગમે છે
પણ ઘરમાં હોઈએ ત્યારે જ !
બહુ થાય તો બારીમાંથી હાથ લંબાવી
હથેળીમાં ફોરાં ઝીલીએ
ઘણાંને વરસાદમાં તરબોળ થવાનું ગમે છે
તે એટલે કે બાથરૂમમાં
માથે લોટો રેડવાની તેમને આળસ ચડે છે
આ તો રસ્તે ઊભા રહેવાનું ને
ઉપરવાળો પલાળે
બાથરૂમની જરૂર જ નહીં !
ઘરમાં આવો તો
ઘરવાળી ટુવાલથી માથું લૂંછી આપે
કોઈ વાર તો બધેથી પાણી આવે છે
ખાલી નળમાં જ નથી આવતું
એટલે ઘણીવાર કોરાં જ રહી જઈએ છીએ
વરસાદમાં વીજળી થાય છે તેની પણ
અમને કોઈ નવાઈ નથી
એવા કડાકા ભડાકા તો અમારે રોજના છે
આડે દિવસે વરને સાદ પડતો હોય છે
પણ વરસાદમાં પડતો નથી
કારણ કે અમે ઘરમાં જ હોઈએ છીએ
વર ઘરમાં જ હોય તો સાદ બહાર કોણ પાડે?
એ બાબતે અમે પૂરા સ્વાવલંબી છીએ
ઘરવાળી ભજિયાં કરે તો જાતે જ ખાઈએ
થાળી જાતે ધોઈએ
ઊંઘીએ પણ અમે જ
કોઈ વાર વિક્સ લગાડવા
ઘરવાળી પોતાનું નાક શોધે
ત્યારે પણ નાક તો અમારું જ ધરીએ
નાક એટલે રાખેલું કે
ચશ્માં એના પર ગોઠવી શકાય
કોઈ વાર એનું વંચાવવા ઘરવાળી
એનાં ચશ્માં અમારા નાક પર ગોઠવે છે
ને અમે વાંચી પણ આપીએ છીએ
પણ અમને સમજાતું નથી
કારણ એ ક્યાં અમારું વાંચવાનું છે !
અમારું કામ અમે જ કરીએ છીએ
સ્વાવલંબી તો એવા કે
પેન્ટ પણ જાતે જ પહેરીએ
પલળીને આવીએ જ નહીં કે ઘર ગંદું થાય
એકવાર બારી ખુલ્લી રહી ગયેલી
એટલે વાછંટથી ફર્શ ભીની થઈ ગયેલી
અમે ઉતાવળે બારી બંધ કરવા ગયા તો
ફર્શ પાછળ ગઈ ને અમે આગળ થયા
અમારે બદલે બીજું કોઈ સરકે તે ન ચાલે
એટલે અમે જ સરક્યા
અમે સ્વાવલંબી જ રહીએ એટલે
ઘરવાળી પણ અમને જોતી જ રહી
પછી પાણી વધ્યું એટલે અમે ઊભા થયા
રેલ આવે છે ત્યારે પ્રાર્થના કરીએ છીએ કે
અમારું મકાન ઊંચે રહે
ને ધરતીકંપે છે ત્યારે પ્રાર્થના કરી છીએ કે
અમારું મકાન નીચે હોય !
અમને મેઘધનુષ ગમે છે
તે એટલે કે એ અહિંસક છે
ધનુષ હોવા છતાં તે તીર છોડતું નથી
ને આપણે … ?
('સંદેશ'ની બુધવારની કોલમ)
000
e.mail : ravindra21111946@gmail.com