શ્રમિક જીવનના પેટગુજારા રફેદફે
ત્યાં સ્વાભિમાન, સ્નેહ, સહારા રફેદફે !
ભૂંડી જ  ભૂખ હોય તો ભારે પડે છે શ્વાસ
એ માર્ગમાં ય રોજ ઊતારા રફેદફે !
ખપ પૂરતી જ પંથમાં ઘરવખરી તે છતાં 
વિશ્વાસની માળાના ય પારા રફેદફે !
પલડું સદાય ઊંચું રહ્યું રંકનું હજી 
તો ત્રાજવામાં ન્યાયના ધારા રફેદફે !
લાખ્ખો અબજ કરોડ મળી સાંત્વના જ 'દાન'
ચાલ્યા છીએ છતાં એકધારા રફેદફે

સૌજન્ય : “નિરીક્ષક” − ડિજિટલ આવૃત્તિ; 30 મે 2020