૧.

અંધારી રાતે,

પ્રજ્વલિત પ્રેમથી વ્યગ્ર,

આનંદિત!

અણદીઠો નીકળ્યો,

ઘર મારું હવે નિરાંતમાં છે.

૨.

અંધકાર અને સુરક્ષા વચ્ચે,

ગુપ્ત નિસરણી તરફ, વેશપલટે,

આનંદિત!

અંધકાર અને ગુપ્તતામાં,

ઘર મારું હવે નિરાંતમાં છે.

૩.

આનંદિત એ રાતે ,

છાનોમાનો, અણદીઠો,

મુજથી જ અદૃશ્ય,

બાહ્ય પ્રકાશ કે ભોમિયા રહિત,

લઈ પ્રજવળતો ફક્ત હૃદય તણો.

૪.

મધ્યાહ્નના સૂર્યથી ય ચોક્કસ

પ્રકાશ તે દોરી ગયો મને

જે સ્થળે મારી પ્રતિક્ષામાં હતો,

જેને ઓળખતો હતો હું સારી પેઠે 

જ્યાં અન્ય કોઈ ન હતું.

૫.

હે પથદર્શક રાત;

પરોઢથી પણ સુંદર રાત;

હે રાત, કરાવ્યો તેં મેળાપ

પ્રેમીનો પ્રિયજન સાથ,

પરિવર્તિત કર્યા તેને તેના પ્રેમમાં.

૬.

માત્ર તેને કાજે અક્ષત રાખેલી,

ફૂલ સમી મારી છાતી પર,

વિસામો કરી તેણે નિંદ્રા લીધી;

મેં તેની માવજત કીધી ને ડોલતાં

સિડર વૃક્ષોએ પંખો નાખ્યો.

૭.

મિનારા પરથી વહેતી હવામાં

લહેરાતા તેના કેશ હતા,

ને ગરદન પર હળવે હાથે

મને તેણે જેવો ટપાર્યો,

ત્યજી ગયું સઘળું સંવેદન મને.

૮. 

વિસ્મૃતિમાં રહી સતત,

ટેકવી શિશ મુજ વહાલા પર;

જગત અને જાતથી પણ અજાણ,

વિસરાયેલાં લીલી પુષ્પો મધ્યે

ફગાવી સઘળી ચિંતા મારી.

e.mail : rupaleeburke@yahoo.co.in