વિપદાઓ જોઈ વિકાસની!
સાંકડી થઈ ગઈ ગલીઓ શ્વાસની !
હાથ આવી ના મતા લીલાશની,
વાડ ચૂસી ગઈ મજા ભીનાશની!
ધારણાઓ સામટી બુઠ્ઠી પડી!
કોઈ લાવ્યું ના હવા વિશ્વાસની.
સાંભળ્યું'તુ ખૂબ એ ઉપવન વિશે
ક્યાં હવે મૌસમ રડે છે ઘાસની!
ઊતર્યા ઓળાઓ કંઈ સંતાપના,
વિસ્તરી ગઈ સીમાઓ આભાસની.
આ ઝળહળ ઝળહળ ક્રીડાઓ પાપની!
કંઈક તો રાખો શરમ ઇતિહાસની!
આવશે આખર ચુકાદો આભથી,
ઠેઠ પહોંચી છે દુઆઓ ત્રાસની.
પૃથ્વી પર હારી ગયા 'મૌલિક’ તમે,
ને કરો છો યોજના અવકાશની !?
સૌજન્ય : “નિરીક્ષક”, 01 નવેમ્બર 2021; પૃ. 16