વિચારી રહ્યો છું
આયનો જોઈને વિચારી રહ્યો છું,
મુખ નિખારવા નિખારી રહ્યો છું.
દિ’ ઊગ્યે દોડધામ કરતો રહું છું,
કામ કરવા છતાં ભિખારી રહ્યો છું.
ગોળ કોણી ઉપર જ ચોંટી ગયો છે,
ગોળને ચાટવા ચિત્કારી રહ્યો છું.
ફેરવી તોળવા પડ્યા શબ્દ મારા,
શબ્દને ફેરથી મઠારી રહ્યો છું.
કોઈ તો ઓળખાણ ઉછીની નહીં દે,
હૈયું બળતાં જ અગ્નિ ઠારી રહ્યો છું.
°
મેશ છું
વાટ પર જામી ગયેલી મેશ છું,
શૂન્યની ગોળાઈ પરનો ખેસ છું.
બાદબાકીમાં વધેલી શેષ છું,
એમ તો તન્હાઈથી વિશેષ છું.
ઈશ, તમારી ચાખડીનો દાસ છું,
હું ભજનના શબ્દની બંદિશ છું.
જિંદગીની મોજમાં મદહોશ છું,
જિંદગીના જોશમાં બેહોશ છું.
ધર્મનો ઉપદેશ ના દો ભેંસ છું,
ધર્મ કરતાં કર્મનો શ્રેયાંશ છું.
e.mail : addave68@gmail.com