કાં તો રેલી; કાં તો સરઘસ નીકળે છે !
સંગઠિત થઇને જો સાહસ નીકળે છે !
રુંવે – રુંવે એવી તો લાગી અગન; કે,
શબ્દે-શબ્દોમાંથી એ બસ, નીકળે છે !
કોઇ પણ ચહેરો જૂઓ અમથો તો એમાં,
ટ્રેજેડી અથવા તો ફારસ નીકળે છે !
રોજ અગિયારસનું વ્રત અનશન સહિતનું,
રોજ કેલેન્ડરમાં બારસ નીકળે છે !
કોઇ કોઈ વાર પૂનમ નીકળે છે,
બાકી તો બસ ! કાળી ચૌદસ નીકળે છે !
બંધ મુઠ્ઠી ખોલું; તો એમાંથી કાયમ,
એની એ કાળી અમાવસ નીકળે છે !
વરસાદી મોસમ સદે છે ક્યાં બધાને ?
તાવ-શરદી સાથે ઉધરસ નીકળે છે !
જોઇʼતી જેને નજર ભૂખી વડે પણ,
સ્વપ્નમાં કેસર ને હાફૂસ નીકળે છે !
એમ રાજીપો ય ફળતો કોઇ વેળા,
લાડવા પર જેમ ખસ ખસ નીકળે છે !
રોજ ગંગા આંખમાં પરગટ થતી; ને,
રોજ સપનામાં બનારસ નીકળે છે !
હું મથું છું સૂર્ય પ્રગટે એને માટે,
ચારે બાજુ ગાઢ ધુમ્મસ નીકળે છે !
ગાંધીજી પણ છે; ને સાથે ગોડસે પણ,
જોઉં છું, તું કોનો વારસ નીકળે છે !
જ્યાં સવારો પડતી; કે ઘરથી ‘પ્રણય’,
આંખમાં લઇ ખૂની ખુન્નસ નીકળે છે !
તા. ૧૭-૧૮/૦૭/૨૦૨૨