હકીકત સાથ ભ્રમણામાં; હવેથી જીવવાનું છે !
અને બળબળતા તડકામાં; હવેથી જીવવાનું છે !
અહીં રૂપિયા ને પૈસામાં; હવેથી જીવવાનું છે !
અને નોટો ને સિક્કામાં; હવેથી જીવવાનું છે !
બધાને સોનું-ચાંદી વ્હાલું છે સહુથી વધારે; તો,
આ સોનાની જ લંકામાં; હવેથી જીવવાનું છે !
ન ધારેલી ય ઘટનામાં; હવેથી જીવવાનું છે !
અહીં જાહેર રસ્તામાં; હવેથી જીવવાનું છે !
કોઇ કોઈ જ ટાણામાં; હવેથી જીવવાનું છે !
વધુ કોઈ ઉખાણામાં; હવેથી જીવવાનું છે !
બધાને પોતપોતામાં જ કેવળ રસ અહીં પડતો,
બધાએ બંધ કમરામાં; હવેથી જીવવાનું છે !
બળે છે સહુની અંદર કૈંક લીલ્લુંછમ્મ સદીઓથી,
એ અગ્નિના ધુમાડામાં; હવેથી જીવવાનું છે !
હવે સમજુ ને સંસ્કારી નહીં જીવી શકે આહીં,
બિભત્સી ચૈનચાળામાં; હવેથી જીવવાનું છે !
હવે તો ઠેકઠેકાણે મળે છે જોવાને રાવણ,
ગમે ત્યાં જાઓ; લંકામાં હવેથી જીવવાનું છે !
તમે ઘરને નથી ચાહી શક્યા સાચી રીતે; એથી,
રઝળવા ને રખડવામાં; હવેથી જીવવાનું છે !
તમે કાચા છો દુનિયાદારીની બાબતમાં બહુ ઝાઝાં,
તો ભઠ્ઠા ને નિંભાડામાં; હવેથી જીવવાનું છે !
ઘડીભરની ય ફુરસદ ક્યાં છે; કોઈને હવે આહીં ?
બધાએ કામ-ધંધામાં; હવેથી જીવવાનું છે !
તમે હાથે કરી વ્હોરી છે પંડિતાઇ દુનિયાની,
તમારે જ્ઞાનગંગામાં; હવેથી જીવવાનું છે !
નથી ત્યાં કામ સીધા-સાદા માણસનું, ખરું કહું છું,
પળે પળ ધમપછાડામાં; હવેથી જીવવાનું છે !
બધાનું લોહી ઉકળે છે; છે આંધણ સઘળે ફદફદતું,
સતત લોહીઉકાળામાં; હવેથી જીવવાનું છે !
ગઝલ કોને જઈ સંભળાવવાની આ નગર માંહે ?
લડાઈઓ ને ઝઘડામાં; હવેથી જીવવાનું છે !
ગયા થાકી જો એકાન્તોથી; તો લાગેલી ભીડ વ્હાલી,
બધી બાજુના ધક્કામાં; હવેથી જીવવાનું છે !
હવે વાણી મરી પરવારી છે જાણે કે સાચેસાચ્,
ખરી-ખોટી જ અફવામાં; હવેથી જીવવાનું છે !
જરૂરતથી વધારે જલ્સાઓ; જાહોજલાલીઓ,
નકામા સાવ ખર્ચામાં; હવેથી જીવવાનું છે !
બહુ બેઠા, અને સૂતા; જીવનની ગોદમાં કાયમ,
મરણ કેરા ય પડખામાં; હવેથી જીવવાનું છે !
હવે દિવસો જ એવા છે; કે લાગે છે કે જીવવાનું,
સતત સંશય ને શંકામાં; હવેથી જીવવાનું છે !
ખરેખર આ જીવન ભરપૂર છે કેવળ અભિનયથી,
પ્રહર આઠે ય તખ્તામાં; હવેથી જીવવાનું છે !
હવે તારી હયાતિની ગઝલ પૂરી ‘પ્રણય’ થાશે,
ક્ષણો થોડીક મક્તામાં, હવેથી જીવવાનું છે !
તા. ૧૮-૧૯/૧૦/૨૦૨૧