‘ગૃહિણી દિને’
મને સપનું આવ્યું કે સ્વાયત્ત નારીવાદી સાહિત્ય અકાદમીની સ્થાપના થઈ!
એક દાદીઅમ્મા, ગૃહિણી અને લેખિકાની ગુજરાતથી પહેલ થાય એવી આશા પૂરી થશે ?
— બકુલા ઘાસવાલા
હું ગૃહિણી :
વર્ષોથી કહેવાતું આવ્યું છે કે
गृहिणी गृहम्युचते।।
ધર્મ, અર્થ, કામ અને મોક્ષની
કર્તવ્યયાત્રા પર
સપ્તપદીનાં વચનોની ભૂલભુલામણીમાં
કયાં ખોવાઈ જવાયું
તેનો અહેસાસ જ ન રહ્યો!
ગયાં વર્ષો, રહ્યાં વર્ષોની
એ દડમજલમાં
પત્ની, મા, ભાભી, કાકી, મામી, દાદી અને
બીજી પણ કંઈકેટલી ભૂમિકાની
વૈતરણી પાર જ કયાં થઈ?
કોઈકે કહ્યું કે
આજનો દિવસ: ત્રણ નવેમ્બર
House Wife Day છે!
ગૃહિણીનાં પ્રદાનની કદરદાનીનો દિન!
ગૃહિણી દિન કે ગૃહિણી દીન?
એ દીનતા મટે ક્યારે?
જીવનભર એણે ભરેલાં
હજારો પાણીનાં બેડાં
વણેલી લાખો રોટલીઓ
ને ઘડેલા અગણિત રોટલા!
દિવસમાં બે વાર વાળેલાં વાસીદાં ને
કરેલી બાળકો, ઘરડાંવરડાં ને માંદાની માવજત!
જેવાં
અઢળક કામની ગણના થાય
ઘરકામનું મળે જો વેતન!
સાથે
પતિ પરમેશ્વર અને દેવનાં દીધેલાં બની રહેજો ‘ગૃહસ્થ’!