મોમ, તને બા કહું તો ગમે?
શું છે કે જરા ગુજરાતી લાગીએ
ડેડને ય ડેડનો બીજો અર્થ ખબર નથી?
તો બાપુજી કહું તો જરા ઘરેલું લાગે!
તમે બંને મારે માટે નીચું ઘાલીને
કમાવામાં પડ્યાં છો તો
જરા આજુબાજુ પણ જુઓ
નહીં તો ભૂલી જશો બધું
આ રાખોડી જેવું ઊડયુંને
તેને કબૂતર કહેવાય
ને બા, જરા ઊંચે જો!
એ વાદળ છે
એ વરસેને તો મેઘધનુષ થાય
ને બાપા, આ પથારી પારિજાતની છે
તમે એના પર નથી ઊંઘતા
એટલે સોનપરી સૂએ છે
તમે બંને થોડું મારી સામે રડોને, પ્લીઝ!
મને ગમશે
ગાલ પરથી થોડું પ્રેશર વહી જશેને
તો રોજ માપવું નહીં પડે
સાચાં આંસું મોળી ચાને મીઠી બનાવે છે
જે પાન પર પડેલાં ઝાકળમાંથી
સૂર્યને પડઘાતો જુએ છે
તેનું અંતર અજવાળાઈ જતું હોય છે
ને મારું માનો તો બંને
એક વાર દરિયે જઇ આવો
એ ખાલી થઈ ગયો છે
કારણ એનું જળ
તમે આંખોમાં ભરી રાખ્યું છે
જરા એને પણ ભરી આવો, પ્લીઝ!
સાચું કહું,
તમે અડધી સદીએ પહોંચવાના
પણ વર્ષો જ પસાર કર્યાં છે
તમે લોકો જીવવાનું ક્યારે શરૂ કરશો?
તમે જીવો તો થોડું હું પણ …
000
e.mail : ravindra21111946@gmail.com