વળામણાં

મારું ગામ મૂકી,

મારી મઢુલીમાંથી

નીકળ્યો હું પગપાળો,

સુખનું ઘર શોધવા !

ખળખળ વહેતું ઝરણું,

અટકી અટકી રોકે મને !

પેલો કેસૂડો રંગ, ઉડાડી,

મહેંકી મહેંકી ટોકે મને !

પેલો પીળો ગરમાળો

લળીલળીને આંસુ સારે,

દોડી આવ્યો ક્યાંકથી,

કેડી પર, બાવળિયાનો કાંટો !

ના જતો, કહી મને ડરાવતો !

પણ, પેલી આડી અવળી,

ખાડા ટેકડાવાળી !

વાંકી ચૂંકી ને સાંકડી,

ભલીભોળી એ પગદંડી!

મને ના ના કહેત ,

ને તો ય, સાથે દોડતી !

વળાવવા નીકળી !

વહાલુડી, સાંકડી કેડી !

ભારે હૈયે,મૂંગી મંતર

ઠેટ, મૂકી ગઈ મને,

પહોળી સડકપર !

ને વળી ગઈ પાછી,

વાટ જોવા મારી !

અમારી યાદોંને,

લઈને કેડ પર !