(હાસ્ય-વ્યંગકાવ્ય)
ફાડી મુખને સિંહ-જાણે કાળ ઊભા સામને !
કેટલા પ્રશ્ર્નો બની વિકરાળ; ઊભા સામને !
રામ જાણે ! કોને બનવાનું ય મારણ આવશે !
સહુએ સારા કામ વચ્ચે; રાજકારણ આવશે !
એમ અમને મન હતું; કે હૈયાધારણ આવશે !
થાય મન રાજી જરીકે; એવું કારણ આવશે !
ક્યાં ખબર એવી હતી; કે ઔર ભારણ આવશે !
સહુએ સારા કામ વચ્ચે રાજકારણ આવશે !
જે હરે અંધારને; એવો સૂરજ ઊગે નહીં !
આજ પણ અજવાસ સઘળા ઘર લગી પૂગે નહીં!
કોઇ ને કોઈક અમથું વિઘ્ન-કારણ આવશે !
સહુએ સારા કામ વચ્ચે રાજકારણ આવશે !
સાંસદો, વિધાનસભ્યો, મંત્રીઓ ને સરપંચ;
જ્યાં જૂઓ ત્યાં રોજ ગજવે ભાષણોથી કૈંક મંચ !
એ શબદને સાંભળીને; કૈં ન તારણ આવશે !
સહુએ સારા કામ વચ્ચે રાજકારણ આવશે !
પક્ષ જેવો ! કાર્યકર્તા પણ અહીં એવા જ છે !
સહુને માટે નાનું-મોટું; પોતીકું કૈં રાજ છે !
સૂત્રધારો સહુ મગરના આંસુ – ધારણ ! આવશે !
સહુએ સારા કામ વચ્ચે રાજકારણ આવશે !
લોકશાહી છે; છતાંયે લોક સહુ લાચાર છે !
વસ્ત્ર લીરેલીર છે; ને છૂટેછૂટા તાર છે !
રોજ નવતર કાયદા; કાળજ-વિદારણ આવશે !
સહુએ સારા કામ વચ્ચે રાજકારણ આવશે !
જ્યાં જૂઓ ત્યાં ખસ્તા હાલત છે; બધું બિસ્માર છે
હૉસ્પિટલ પોતે હવે તો ખુદ અહીં બીમાર છે !
કેમ દર્દી થાય સાજા ? શું સુધારણ આવશે ?
સહુએ સારા કામ વચ્ચે રાજકારણ આવશે !
રોજ અખબારો મહીં વાંચી ખબર; કૈં થાય નહિ !
આ નગર જાણે કે કોઈ છે મગર ! કૈં થાય નહિ !
જીવલેણી સહુ સમસ્યાનું નિવારણ આવશે ?
સહુએ સારા કામ વચ્ચે રાજકારણ આવશે !
લોભ-લાલચ, પદ-પ્રતિષ્ઠાના બધા મોહતાજ છે !
શબ્દને વેંચે બજારે ! એમ પણ કવિરાજ છે !
ક્યાંથી કોઈ શબ્દ સાચાનો ઉચારણ આવશે ?
સહુએ સારા કામ વચ્ચે રાજકારણ આવશે !
સહુ ભલે મરતાં ! ભલું મારું કરું; નો ભાવ છે !
કોણ સમજે; આ અસુરોનો જ જે સ્વભાવ છે !
કઇ રીતે મુશ્કેલીમાંથી અહિ ઉગારણ આવશે ?
સહુએ સારા કામ વચ્ચે રાજકારણ આવશે !
રાંકના રૂપિયા અમીરો કાજ જો વપરાય તો ?
શાનશૌકત કાજ જો સરકાર ખુદ ખર્ચાય તો ?
લોકલાજે યાતના-પીડાનું કારણ આવશે !
સહુએ સારા કામ વચ્ચે રાજકારણ આવશે !
ફાઇલો રંકોની ટેબલ મધ્યમાં અટવાય તો ?
હક ખરેખર હોય; એ પણ હાથથી ઝુંટવાય તો ?
ભીડ રૂપે રોષ; સૃષ્ટિનો ધખારણ આવશે,
સહુએ સારા કામ વચ્ચે રાજકારણ આવશે !
ક્યાં ભણેલાને મળે છે ? નાની-મોટી નોકરી !
રોજગારી વિણ ભટકતાં છોકરાં ને છોકરી !
સ્કૂલો-કોલેજો હજારો; સહુને ભારણ આવશે !
સહુએ સારા કામ વચ્ચે રાજકારણ આવશે !
ટી.વી., મૉબાઈલ માંહે રત જમાનો જોઉં છું !
તન અને મન રાંક જોઈ; હું ય મનમાં રોઉં છું !
ખોઉં છું, ખોવાઇ દુનિયામાં; શું તારણ આવશે ?
સહુએ સારા કામ વચ્ચે રાજકારણ આવશે !
મન પડે એવી રીતે જીવે હજુ યે માણસો !
ક્યાંક દારુ ! આંસુઓ પીવે હજુ યે માણસો !
કામ ક્યાંથી દેશનું ત્યાં; એ બંધારણ આવશે ?
સહુએ સારા કામ વચ્ચે રાજકારણ આવશે !
જે હતું સારું જરીકે; એ ય સહુ બગડી રહ્યું !
તાલ-સુર વિણ વાદ્ય અમથું; એનું એ વગડી રહ્યું!
એમ અમને તો હતું કે; કૈં સુધારણ આવશે !
સહુએ સારા કામ વચ્ચે રાજકારણ આવશે !
કચડી નાખે; એ ચરણને શીઘ્રતાથી રોકજો,
અણસમજ એ હોય તો સાચી શિખામણ ઠોકજો,
કારણો લાખો નહીંતર; દુ:ખવધારણ આવશે;
સહુએ સારા કામ વચ્ચે રાજકારણ આવશે !
તા. ૨૬-૨૭/૦૫/૨૦૨૦