ગાય મરી ગઈ

બાઈ મરી ગઈ

ગાય મરી ગઈ

અરે મરી ગઈ

ભર બજારમાં લથડી લથડી

ભૂખે પેટે તફડી તફડી

પેટ પાંસળાં ચોંટેલાં લઈ

પોળ પોળમાં રખડી રખડી

અરે, રામ છેવટે જૂઓ

આ ગાય મરી ગઈ

અને જૂઓ 

આ મંદિરમાંથી સરઘસ નીકળ્યું

ધજા પતાકા ઢોલ ધડૂકતા

અબીલ ગુલાલે ગાય મરેલી

ઢંકાઈ ગઈ

ને અંતિમ સંસ્કાર કાજ

લો ચાલી જાતરા

ઘડી જીવનની આજ સફળ થઈ

મહાજન ઉમટ્યું

બજાર સઘળી બંધ કરીને

રામધૂનની રમઝટ જામી

ધૂમ મચી ગઇ

ધરમ નામની  ધૂમ મચી ગઇ

કાળા નાણાંવાળા આવ્યા શેઠ કરમચંદ

દૂધ પાણીને ભેળવનારા

ને લોકોને છેતરનારા

ધરમદાસ પણ આવી પહોંચ્યા

આજે જેણે ઘર ડોલાવ્યા

ખેડૂ કેરાં ખેતર માંડ્યાં

વીરચંદજીયે જોડાયા

અને ભગત જેને ત્યાં

સાચોસાચ પાપ સૌ નાચ કરે છે

સૌથી આગળ સરઘસ માંહે

રહ્યા ચાલતા

ઝૂલે રેશમી ઝબ્બા ઉપર શાલ કાશ્મીરી

રાધેશ્યામ તણી સૌ માયા

રાધેશ્યામ તણી સૌ માયા.

અરે મરી ગઈ

કૂવો પૂરી ગામ બધાને

હાય અરે હેરાન કરી ગઈ

ધણી બિચારો રઝળી પડ્યો હતો

રોજી એની તૂટી ગઈ’તી

ઘેર હાંડલી પણ નહોતી રહી

હાય! બિચારાના જીવનમાં

આઝાદી ના ક્યાં ય વસી ગઈ

રોજી તૂટી રોજી ખૂટી

અને એક ઓરતની ઈજ્જત

શેઠ તણા શેતાને લૂંટી

ઘેર ભાખરી એકે નહોતી

ભૂખ્યાં બાળક ભૂખી માતા

કામ ગોતતી રોતી રોતી

ભમતી થઈ’તી હાથ પડી ગઈ

ટીલું તાણી બેઠેલા એક

શેઠપુત્રને હાથ પડી ગઈ

અને મરી ગઈ

બાળકને લઈને

બે બાળકની માટે મરી ગઈ

કૂવો પૂરી

ભૂખે અહીંયાં લથડી લથડી

હૈયે રોજે ફફડી ફફડી

પડતી મારગ ખાતી ચકરી

જીવન કેરો રાહ ચૂકી ગઈ

અરે મરી ગઈ એક મજૂરણ

નહિ મંદિરે સરઘસ નીકળ્યું

નહિ શેઠનાં હૈયાં હાલ્યાં

નહિ ભગતને ભાવ ઉમટ્યા

દેશ તણી દુબળી દુહિતાને

ચોગરદમ છે આગ ફરી ગઈ

ગાય મરી ગઈ!

હાય! બિચારી ગાય મરી ગઈ

બાઈ મરી ગઈ!

હાય!બિચારી બાઈ મરી ગઈ!

(1975)