કરો ખમૈયા, બંધ કરો આ નકરો વાણી વિલાસ
સૂગ ચડે છે અમને જોતા ભાતભાતના લિબાસ
કરો ખમૈયા, બંધ કરો આ નકરો વાણીવિલાસ
ઘેલા થઈને જોઈ રહ્યા’તા શુભદિવસોની વાટ
પણ મિજબાની કરતા દીઠાં ગીધડાં સરિતાઘાટ
નવરા બેઠા અમે આદરી મનની ફેરતપાસ
કરો ખમૈયા, બંધ કરો આ નકરો વાણીવિલાસ
ભૂલા પડ્યા કે મારગ ભૂલ્યો કોને કરીએ રાવ?
ધોળા દિવસે, સૂરજ સાખે લાગ્યા કેવા ઘાવ!
નજરું સામે એ તો મહાલે, કરીએ કેમ તલાશ?
કરો ખમૈયા, બંધ કરો આ નકરો વાણીવિલાસ
સૌજન્ય : “નિરીક્ષક”, 01 જૂન 2021; પૃ. 11
છેલ્લા સાઠ માસના મારા શ્વાસ-ઉચ્છવાસની
લખવા બેઠો છું વહી
ત્યાં જાણે કોઈક મને પૂછી રહ્યું છે.
‘કોન હાટે તૂઈ બિકોતે ચાસ
ઓ રે આમાર ગાન?’
શો ઉત્તર વાળું?
કેટકેટલી મંડાઈ છે મારી આજુબાજુ હાટ!
ચકરાવે ચડ્યા છે શબ્દો –
વ્યવહારના, વેપારના, વાયદાના
હું છું તો
‘We, the people’માંનો એક
કહો, કહેવું હોય તો ‘હું નાગરિક છું.’
પણ મારે માનવાનું છે એ જ સત્ય
જે મને સંભળાવાય છે
મારે નથી ગાવાની પેલી પ્રાર્થના …
‘અસત્યો માંહેથી પ્રભુ પરમ …’
મારે મારા તર્કને મારી દેવાનું છે તાળું
મારે બસ આટલું જ સમજવાનું :
‘સાંભળો, અમે લઈ આવ્યા છીએ
તમારા માટે આવતી કાલ, ઊજળી આવતી કાલ,
તમે સુરક્ષિત છો. બદલશો નહીં ચાદર-ઓછાડ.
Email : prafull.raval@yahoo.com
સૌજન્ય : “નિરીક્ષક”, 16 ઍપ્રિલ 2019; પૃ. 20
સાઠ વર્ષના અન્તરાલે,
આ પોષની થાકેલી સાંજે,
જૂના મહોલ્લાના ઝાંપે
વીજળીના થાંભલાને અઢેલીને ઊભો છું,
ત્યારે
એ ફળિયું ને એ સરિયામ
એ તુલસીક્યારો ને એ મંદિર
સંતાકૂકડી રમતાં બાળકો
કોઈ ખીલેલા, કોઈ કરમાયેલા
કોઈ રુક્ષ, કોઈ ચિંતાગ્રસ્ત ચહેરાઓ
વીંટળાઈ વળ્યા છે જાણે મને કંઈક ને કંઈક કહેવા.
જીમાશીનો પથરાયેલો કડપ,
સાથે મધુબાનું વેરાતું સ્મિત,
હજુયે જાણે સ્પર્શે છે મને,
સવારે ફળિયું વાળતાં-વાળતાં ઊડતી ઝીણી ધૂળ,
આંગણે મૂકેલી સગડીમાંથી નીકળતો ભૂખરો ધુમાડો,
હવાની દિશા પકડીને ભરાતો કોઈના ઘરના ઓરડામાં
ને આરંભાતું વિનિતાઓનું વાક્યુદ્ધ
બધાયે ચહેરામાં એક સાવ નોખો ચહેરો અત્યારે પણ જોઉં છું,
કેવો નિરાધાર!
એ ચહેરાના આધારે ભરાઈ ગઈ છે મારી વહી,
બસ, અવગણનાની એક ગીતા રચાઈ ગઈ છે.
તોય નહોતો કળાતો
કશોય અભાવ એ ચહેરા પર
‘અમે તો ઓળગાણાં
અમારે વળી શું ભાવ, શું અભાવ?’
હા, હું મણિવઉની વાત કરું છું,
એ કહેતી’તી :
‘જે દિ’ ન કોઈ ધુત્કારે અમને
તે દિ’ અમારે મન સોનાનો.
બાકી તો નસીબમાં ઠેબાં ને ઠેબાં.’
આ ક્ષણે હુંય જાણે ઠેબે ચડ્યો છું મારામાં.
E-mail : prafull.raval@yahoo.com
સૌજન્ય : “નિરીક્ષક”, 16 માર્ચ 2019; પૃ. 11