સીમાએ અમરના શબ્દો સાંભળ્યા હતા, પણ સીમા ચૂપ રહી. અમરે ફરી કહ્યું, “સીમા, કંઈક તો બોલ! બસ આજે આપણે ખૂબ મોજ મસ્તીને વાતો જ કરવી છે. સીમા, તું ચૂપ કેમ છો? તબિયત તો સારી છે ને?”
અમરે ઘીમેથી હળવા પગે સીમા પાસે જઈ મોઢા ઉપરથી પાનેતરનો છેડો દૂર કરી એકદમ પોતાની બાહોમાં જકડી લીધી. બે પળ પછી સીમા ચીસ પાડીને અમરથી અળગી થઈ, દોડીને ધ્રૂજતી ધ્રૂજતી ખુરશીમાં બેસી ગઈ. અમર હતપ્રત થઈ ગયો. તેને સમજાયું નહીં કે સીમાને એકાએક શું થયું. અમરે સીમાને પાણી આપ્યું. થોડેક દૂર બેસી પ્રેમથી ધીમા અવાજે પૂછ્યું, “હવે કેમ છે?”
“મને સારું છે પણ બહુ ઊંઘ આવે છે. હું થાકી ગઈ છું. મારે સૂઈ જવું છે.”
અમર મેચ્યોર અને સમજુ હતો. “સારું તું આરામ કર. આપણે કાલ વાત કરીશું. આપણી પાસે આખી જિંદગી વાતો અને પ્રેમ કરવા માટે પડી છે. હું પણ થાકી ગયો છું. હું તને આ વાત કહેવાનો જ હતો.”
અમર વિચારમાં પડી ગયો. કારણ કે તે સીમાને ઘણાં વર્ષોથી જાણતો હતો. બંને ખૂબ સાથે ફર્યાં હતાં. પણ કદી સંયમની રેખા ઓળંગી નહોતી. અમરને વિચાર આવ્યો કે જેમ મને આજે મારા પરણિત મિત્રોએ જાત જાતની વાતો કરીને, સલાહ સૂચનો આપીને મુંઝવ્યો હતો. તેવું સીમા સાથે તો નહીં બન્યું હોય ને? સીમાના મનમાં તેની સહેલીઓએ કલ્પિત ભય તો ઊભો કરી દીધો નહીં હોય ને? અને સીમાની પ્રતિક્રિયા તેનું પરિણામ હોય. આજનો બનાવ તેના માટે આશ્ચર્યજનક હતો. કારણ કે, ભૂતકાળમાં આવું વર્તન સીમાએ ક્યારે ય કર્યું નહોતું. ક્યારેક અમરે આવેશમાં આવીને સીમાને બાથમાં ભીડી દીધી હતી. હળવું ચુંબન પણ કર્યું હતું. ત્યારે સીમાએ પણ એ જ પ્રતિક્રિયા આપી હતી. અમર વિચારમાં પડી ગયો, ‘કંઈક તો ગરબડ છે. મારે સીમા સાથે સરળતાથી અને સહાનુભૂતિથી આગળ વધવું પડશે.’ અમરે, તેના સાઇક્રેટિક્સ ડૉક્ટર મિત્રને બનાવની વાત કરી.
“તું એમ કર કાલે ભાભીને લઈને આવ. તારે ભાભીને આવી કોઈ વાત કરવાની નથી. ફક્ત મને મળવા સિવાય કંઈજ ન કહેતો. હું તને લીલી ઝંડી ન આપું ત્યાં સુધી તું શાંતિ રાખજે. હું ભાભી સાથે મારી રીતે વાત કરી લઈશ, તું ચિંતા ન કરતો.”
“અમર, ભાભી એકદમ નોર્મલ છે. ચિંતાજનક કોઈ વાત નથી. પણ તેં જે વાત કરી એ પ્રમાણે મારા મતે ભૂતકાળમાં કોઈક ખરાબ બનાવ ભાભી સાથે બન્યો હશે અને તેનો ડર ભાભીના મનમાં બેસી ગયો છે. જે, તેને તારી પ્રતિક્રિયાથી યાદ આવી ગયો. એટલે આંતરિક છૂપા ડરથી ડરીને ભયભીત થઇ ગયાં હતાં. તું એમ કર કોઈક હિલ સ્ટેશન ઉપર હનીમૂનનો પ્રોગ્રામ બનાવ અને ધીમેધીમે તારી કોઈ ચેષ્ટા કે પ્રતિક્રિયા સિવાય તેના મનમાં બેસી ગયેલા ડરનું કારણ જાણ. બીજી એક મહત્ત્વની વાત, તું ભાભી સાથે વાતચીતનો દોર શરૂ રાખજે પણ તને એમ લાગે કે હવે અહીંયાં અટકી જવું પડશે, તો વાતની બીજી તરફ વાળી દેજે. તું શારીરિક સંબંધમાં આગળ વધવા માટે તારા તરફથી કોઈ ચેષ્ટા ન કરતો. ભાભીને ધીમેધીમે આગળ વધવા દેજે એટલે મારું જે અનુમાન છે, એવું જો ભૂતકાળમાં ભાભી સાથે બન્યું હશે તો એ ડર ભાભીના મનમાંથી નીકળી જશે. WISH YOU ALL THE BEST.”
અમરે, માઉન્ટ આબુમાં સારી હોટલમાં રૂમ બુક કરાવીને હોટલવાળાને સૂચના આપી હતી કે ‘અમે હનીમૂન માટે આવીએ છીએ એટલે તે પ્રમાણે રૂમની સજાવટ કરજે.’ હોટલવાળાએ હનીમૂન સ્વીટને અનુરૂપ રૂમમાં વ્યવસ્થા ગોઠવી દીધી હતી. રૂમમાં ઝાંખી પણ રોમેન્ટીક મૂડ વધારતી રંગબેરંગી લાઈટ હતી. રૂમમાં માદક અત્તરની સુગંધ ફેલાયેલી હતી. સીમા રૂમમાં દાખલ થઇ, રૂમની સજાવટ જોઈને ખુશ થઈ ગઈ.
અમરે સીમાનો રોમેન્ટીક મૂડ જોઈને પૂછ્યું, “સીમા, એક વાત પૂછું! આપણી પ્રથમ રાત્રિ પછીથી તું મૂંઝાયેલી, ડરેલી અને કંઈક ભયભીત લાગે છે. વાત શું છે? આપણા પ્રેમ લગ્ન છે. પણ, તું આપણા લગ્નથી ખુશ તો છો ને?”
“અમર એવી કોઈ વાત નથી. હું તો આપણા લગ્નથી ખૂબ ખુશ છું, હા! પણ …”
“કેમ અટકી ગઈ? તારી જે કંઈ તકલીફ હોય, મનમાં કોઈ બાબતનો ડર હોય, જે હોય તે. તું મને નિશ્ચિંત થઈને કહે. હું અત્યારે પણ તારી સાથે છું અને ભવિષ્યમાં પણ તારી સાથે જ રહીશ.”
“અમર, અમારું સંયુક્ત કુટુંબ છે. એટલે ઘરમાં કેટલા ય મહેમાનો અને સંબંધીઓનો આવરો-જાવરો રહે. અમારા ઘરે ક્યારે ય કોઈને એકલા રહેવાનો પ્રસંગ ન બને. કારણ કે, કોઈક ને કોઈક તો ઘરમાં સાથે હોય જ પણ એક વખત એવું બન્યું કે ખૂબ જ નજીકના સંબંધીને ત્યાં લગ્નપ્રસંગે બધાંને જ જવાનું હતું. સાથે ધાર્મિક પ્રસંગ પણ હતો. મને અડચણ આવી ગઈ. ધાર્મિક પ્રસંગ હોવાથી હું જઈ શકું તેમ નહોતી; એટલે હું ઘરે એકલી રહી. સવાલ ફક્ત સવારથી સાંજ સુધીનો હતો એટલે કંઈ ચિંતા જેવું નહોતું.
હું, ઘરે એકલી હતી. એક પરિચિત સંબંધી આવ્યા. એ વારંવાર અમારે ઘરે આવતા હતા. હું તેને ઓળખતી હતી. ચિંતાનું કે બીજું કંઈ વિચારવાનું કોઈ કારણ નહોતું એટલે હું તેમને આવકાર આપી, ડ્રોઇંગ રૂમમાં બેસાડી, અંદર તેમના માટે ચા બનાવા ગઈ. તેમણે અચાનક મારી પાછળ આવી મને એકદમ બાથ ભીડી દીધી. મેં છૂટવા ખૂબ પ્રયત્ન કર્યા પણ એ મારી કરતાં મજબૂત હતા. મારે તેની સાથે બહુ ઝપાઝપી થઈ, અંતે મેં ચીસાચીસ કરી મૂકી એટલે બીકથી મને છોડી એ ભાગી ગયા. હું બારણું બંધ કરીને ક્યાં ય સુધી ખૂબ રડી. ઘરનાને વાત કરી. તેની સાથે ખૂબ મોટો ઝઘડો થયો. એ આવીને મારી માફી માગી ગયા પણ એ બનાવ પછી મારા મનમાં છૂપો ડર પેસી ગયો હતો. હું રૂમમાં આવતાં પણ ડરતી હતી. તે પ્રેમથી મને તારી બાહોમાં જકડી, પણ ભૂતકાળના બનાવથી મનમાં ઘુસી ગયેલા કલ્પિત ભય અને ડરથી હું ચીસ પાડી તારાથી અળગી થઈ ગઈ.”
વાત કરતાં કરતાં સીમા રડવા લાગી. અમરે તેને રડવા દીધી અને સીમા રડતાં રડતાં સૂઈ ગઈ. અમરને સીમાના મુખ પરથી કલ્પિત ભયની છાયા હટી ગઈ હોય એવું લાગ્યું.
બીજે દિવસે સવારે સીમા ઊઠી ત્યારે ફ્રેશ હતી. સીમાએ રૂમ સર્વિસમાં સર્વ કરવામાં આવેલી ચામાંથી અમરની પસંદગીની ચા બનાવી કપ લઈને અમર પાસે આવી.
“અમર તારો ખૂબ ખૂબ આભાર. જો તું મને ન સમજ્યો હોત તો મારું શું થાત? તું મારા માટે શું વિચારત?”
“સીમા, મેં કંઈ નથી કર્યું. મારો મિત્ર સાઇક્રેટિક્સ છે. તેની પાસે તારી જેવા ભૂતકાળમાં કોઈની સાજિશ કે અનિચ્છનીય બનાવોના ભોગ બન્યા હોય એવા કેસ આવતા હોય છે. મેં તેને આપણી પ્રથમ રાતના બનાવની વાત કરી એટલે એ સમજી ગયો અને તેના કહેવાથી અહીંયાં આવવાનો, તારી સાથે મુક્ત મને વાત કરવાનો પ્રોગ્રામ બનાવ્યો. સીમા આપણા સમાજમાં આ એક ખામી છે. જે પીડિત છે તેને સહાનુભૂતિ, સહકાર કે આશ્વાસન આપવાના બદલે આપણે તે ઘટના માટે તે જ વ્યક્તિ કારણભૂત હોય એવું વર્તન કરીએ છીએ. પરિણામે પીડિત વ્યક્તિ વધારે તૂટી જાય છે અને જે અસામાજિક તત્ત્વો છે, એ તેનો લાભ લઈને છૂટી જાય છે. તને જેમ તારા ઘરનાએ આ ઘટના માટે દોષિત ન માની અને તરત જ એક્શન લીધી એમ જો બધાં જ વિચારીને કરે, તો દુષ્ટ માણસોને સજા આપવા માટે કાયદો તો પૂરેપૂરો સક્ષમ છે.”
સીમા પ્રેમભર્યા નયનથી અમર સામે જોઈ રહી. સીમાને આજે અમર પૂરેપૂરો સમજાઈ ગયો હતો. હવે તેના મનમાં કોઈ પ્રકારનો ભય રહ્યો નહોતો.
સીમાનો મૂડ જોઈને અમરે નખ્ખી લેકમાં બોટિંગનો પ્રોગામ બનાવ્યો. સીમાએ બધી જ વાત અમરને કરી દીધી એટલે મનથી હળવી થઇ ગઈ હતી. તેમ જ અમરે જે વાત કરીએ સાંભળીને સીમાએ બધું ભૂલી, ખૂબ મજા માણી. રાત્રે ડિનર પછી અમરે કહ્યું,
“સીમા મને જરા તારા ખોળામાં માથું રાખી માથું દાબી દે ને. તારા મૃદુ હાથના સ્પર્શથી મારુ માથું જલદી ઉતરી જશે.”
સીમા, અમરનું માથું દબાવતાં દબાવતાં ધીમેધીમે કલ્પિત ડરમાંથી બહાર આવતી ગઈ અને અમરમય બનતી ગઈ. અમર પણ ધીમેધીમે પ્રતિભાવ આપતો હતો. અંતે અંદરથી પ્રેમથી ઉકળતી પણ લાગણીથી થીજેલી હિમનદી અમરમય બનીને અમરમાં ઓગળી ગઈ….
(ભાવનગર, ગુજરાત)
e.mail : nkt7848@gmail.com
