સત્યનો નાભિશ્વાસ ચાલે છે !
જૂઠનો પણ પ્રયાસ ચાલે છે !
એ જ વક્તા, અને શ્રોતા પણ એ,
એ જ વાણીવિલાસ ચાલે છે !
બાપનો હો બગીચો; એ રીતે,
શખ્સ સહુ આસપાસ ચાલે છે !
એક સાથે પચાસ ઊભા છે,
એક સાથે પચાસ ચાલે છે !
ચાંદની બંગલામાં ફેલાઈ,
ઝૂંપડીમાં અમાસ ચાલે છે !
સાથ મંદી; અને મહામારી,
ને અધીક બારમાસ ચાલે છે !
મારી સાથે મેદાન બોલે છે,
સાથે સાથે જ ઘાસ ચાલે છે !
ચાલે છે; આ બધું યે સાચ્ચેસાચ ?
કે પછી મનનો ભાસ ચાલે છે !
ના ગઝલ હોત ‘પ્રણય’, શું થાતે ?
મન હજુ છે ઉદાસ; ચાલે છે !
તા. ૧૬/૦૬/૨૦૨૧