હું બેચૅન છું (૭)
ફિલિપાઈન્સના મનીલા શહેરથી ઉત્તર-પશ્ચિમે ૪૫ કિલોમીટર દૂર ઍન્જલસ સિટી નામનું એક ‘ખ્યાત’ શહેર છે.
ત્યાંના સ્લ્મ્સમાં જિવાતા નારીજીવનની આ કેવી તો હૃદયદ્રાવક કહાની છે…
એશિયાનું એ એક માત્ર સ્થળ છે જ્યાં ‘સૅક્સ ટુરિઝમ ટ્રેડ’ ચાલે છે. ટ્રેડ એટલે વેપાર. પણ આ વેપાર કેવો? પ્રવાસીઓ માટે સૅક્સનો વેપાર. પ્રવાસીઓ માટે વેશ્યાઓનો વેપાર.
ઍન્જલસમાં આવતા પ્રવાસી-પુરુષોને સોશ્યલ મીડિયાથી જરૂરી માહિતી ઘેરબેઠાં મળી જાય છે. ત્યાંનાં રસીલાં ફેસબુક-ગૃપ્સ અને કેટલીક વેબસાઈટ્સ સૅક્સ માણવા માટેની તમામ મદદો પૂરી પાડે છે – કહે છે, વૅલકમ ટુ … ઍન્જલસમાં, પધારો. એવી નગરીમાં, જ્યાં, લખે છે એ લોકો, કે ‘યુ કાન્ટ હૅલ્પ બટ ગેટ લેઈડ’ = ‘તમે ભૈ, સૅક્સ માણીને જ જશો’. તમારો છૂટકો નથી …’
નગરની વિશેષતા છે, GFE, ગર્લફ્રૅન્ડ ઍક્સપીરિયન્સ. સ્ત્રીને તમે એક દિવસ માટે કે એક રાત માટે કે તમે ઈચ્છો તો એક માસ માટે ગર્લફ્રૅન્ડ તરીકે લઇ જઇ શકો છો. કહેવાની જરૂર નથી કે તમારે ઈચ્છા મુજબના પૈસા આપવાના હોય છે.
પેલા સોશ્યલ મીડિયાવાળાઓને ત્યાં બ્લૉગ્સમાં એ પુરુષ-પ્રવાસીઓ પોતાના ‘સુખ’દાયી અનુભવો લખે છે ને એકબીજા જોડે ‘જરૂરી’ ‘ટિપ્સ’-નો વિનિમય કરે છે. એ લખાણોનો સાર જાણો:
ત્યાં IDની જરૂર નથી. ત્યાં એક ઉપરાન્તની જોડે પણ વારાફરતીથી મૉજ માણી શકાય છે. કોઇ રોકતું નથી. સૌથી ખતરનાક વાત સાંભળો —
ત્યાં કૉન્ટ્રાસૅપ્ટિવ્સની પણ જરૂર નથી ! એક પ્રવાસીવીરલો તો રાજી થઈને જણાવે છે કે પોતે ૪૦ કૉન્ડોમનું પૅક લઇને ગયેલો પણ ખોલ્યા વિનાનું એવું ને એવું ઘરે પાછું લઇ ગયો.
સંસારમાં વેશ્યાવાડો નવી વસ્તુ નથી. વેશ્યાબજારો આપણા દેશમાં ને અન્ય દેશોમાં ય છે પણ સૅક્સ ટુરિઝમ ટ્રેડ નવી વસ્તુ છે. દુનિયાભરનાં વેશ્યાવાડા સેફ સૅક્સની રીતે જ ચાલે છે પણ ફ્રી સૅક્સથી ચાલે એ નવી વસ્તુ છે. વેશ્યાગમનના અનુભવો વૈયક્તિક મામલાઓ છે પણ ઈન્ટરનેટ પર એ ‘સુખદ’ ઘટનાઓની ખુલ્લા મને થતી ગલીચ અભિવ્યક્તિઓ નવી વસ્તુ છે.
ફિલિપાઈન્સ ગરીબ દેશ છે. કહે છે, ત્યાં ગરીબમાં ગરીબ જનો વસે છે. એ બધી સ્ત્રીઓ સ્લ્મ્સમાં રહે છે. ‘કામ’ ન મળે તો ડૂચા વીણે, કચરા ઉપાડે, ઉપયોગી વસ્તુઓ છૂટી પાડે, વગેરે. વૃદ્ધાઓએ પણ વેશ્યાવ્યવસાયમાં જોડાવું પડે છે.
લોકલ ટુરિઝમ ડિપાર્ટમૅન્ટ પોતે જણાવે છે કે દર વર્ષે ૪.૭ મિલિયનથી પણ વધુ પ્રવાસીઓ ફિલિપાઈન્સ આવે છે. એમાં ૧.૨ મિલિયન પુરુષો હોય છે. કોરિયા, યુ.ઍસ.એ., ચીન, ઑસ્ટ્રેલિયાથી વધારે હોય છે.
૨૦૧૧માં ફિલિપાઈન્સના અમેરિકન ઍમ્બેસેડરે જણાવેલું કે ૪૦ ટકા પુુરુષ-પ્રવાસીઓ માત્ર સૅક્સ માટે જ આવેલા. જો કે ગીરદી એવી હોય છે કે ખરી ટકાવારી બાબતે અહીંના ઍફિસરો હમેશાં ગૂંચવાયા કરે છે.
કહેવાય છે કે ઍન્જલસ સિટીમાં કેટલાં ય અઠવાડિયાં લગી તમને વિદેશી મહિલા જોવા નહીં મળે. ત્યાં તો ફિલિપિનો સ્ત્રીઓ ને પરદેશી પુરુષો જ જોવા મળે છે !
પણ બ્લૅક હ્યુમર એવો કે આ અવૈધ સન્તાનોનો પૅરન્ટેજ ‘યુનાઈટેડ નેશન્સ’-નો કહેવાય ! -કેમ કે કોઇ ગોરું છે, કોઇ કાળું છે, કોઇની મૉખરાશ કોરિયન છે, કોઇની કોકેસિયન છે. કેમ કે એમના ‘બાપ’ બધા સૅક્સ-ટુરિસ્ટ હતા.
બાય ધ વે, હું કલ્પના કરું છું કે આખું ઍન્જલસ આવું નહીં હોય. થોડીક તો સારી હકીકતો હશે.
આ બધા ઘરાકોને ‘વ્હૉરમૉન્ગર્સ’ કહેવાય છે. એ શબ્દના અનુવાદ રૂપે મને ‘વેશ્યા-ઉપકારી’ શબ્દ સૂઝ્યો પણ મને થયું, ના, બહુ બંધબેસતો નથી, કેમ કે
એમાંથી ‘મૉન્ગર’-ના હલકટતાવાચી સંકેતો નથી પ્રગટતા …
આઘાતક વાત એ છે કે —
એવા મૉન્ગરોને કારણે અને પરિણામે ઍન્જલસમાં એવી ‘વર્કિન્ગ ગર્લ્સ’ છે, જેમને એમના ઘરાકોથી સન્તાનો થયાં હોય છે. નગરની ૪૦થી ૫૦ ટકા છોકરીઓએ પોતાનું પહેલું બાળક એવા મૉન્ગર્સથી જણ્યું છે. એ બાળકોને ઝૂલતાં મેલીને મૉન્ગરો ચાલી ગયા હોય છે, એમને તે વળી બાળકોની શી પડી હોય !
હવે, આ બધા સંકેતો ‘વેશ્યા-ઉપકારી’-માં તો ક્યાંથી આવે? અને મને મારી સૂઝસમજ ગાળ લખવાની ‘ના’ પાડે છે.
એવી મૉન્ગરપીડિત એક છોકરીનો દાખલો લખીને ચૂપ થઇ જઉં:
જુડિથ ૨૨ વર્ષની છે. બે નાના રૂમના ઘરમાં ૮ જણાં રહે છે, સાથે, એનો ૩ વર્ષનો દીકરો જાડેન પણ ખરો. જાડેનનો ‘બાપ’ એની જિન્દગીનાં ૫૦ વર્ષ વટાવી ચૂકેલો અંગ્રેજ કોલિન છે. જુડિથ ત્યારે ૧૯-ની હતી, નવી નવી વર્કર. ૧૦ અઠવાડિયે ખબર પડેલી કે પોતે પ્રૅગ્નન્ટ છે. હાલ જુડિથ અને એની ૧૮ વર્ષની બહેન જૉય એક બારમાં સાથે કામ કરે છે. ઍન્જલસમાં એવી બારબાળાઓ તો ડઝનો છે, ઘરાકોને આકર્ષવા સાંજના ૬-થી રાતના ૩ લગી નાચે છે, કહો કે નાચવાનો શ્રમ વૅંઢારે છે. શ્રમફળ એમને એ મળે છે કે કોઇ એમને ‘લઇ’ જાય છે. જુડિથ કહે છે – ઘરાકો ઈચ્છતા હોય છે કે પહેલાં અમારે એમની જોડે ‘પીવું’ પણ જોઇશે. સૉફ્ટ ડ્રિન્કનું કહીએ તો ગુસ્સે ભરાય છે…
જુડિથને કોઇ જાડેનના ‘બાપ’ વિશે પૂછે તો શું કહે? કહેવા ચાહે તો ય શું કહી શકે? કહ્યું કે – એ મારી જિન્દગીને સ્પર્શ્યો, એમાં પ્રવેશ્યો, પણ ચાલી ગયો. જાડેનનું શું? તો એણે કહ્યું કે બધી મા-ઓની જેમ હું પણ જાડેનનો સરસ ઉછેર કરવા ચાહું છું ને હું જોઇશ કે એ પૂરેપૂરું ભણેગણે …
જાડેન મોટો થઇ રહ્યો છે પરન્તુ એની મા જુડિથને મોટા થઈ જવાનું પોસાય એમ નથી. પેલો અંગ્રેજ ક્યાં હશે? ભગવાન જાણતા હશે? મને ખબર નથી …
===
આ લેખમાં હકીકતરૂપ વીગતો મેં ‘ધ ગાર્ડિયન’-ના ૭ જાન્યુઆરી ૨૦૧૯ના રીપોર્ટમાંથી લીધી છે, બાકીની રજૂઆત મારી છે.
(૨૭ ઍપ્રિલ ૨૦૧૯, આમ્સ્ટર્ડામ)
https://www.facebook.com/suman.shah.94/posts/2460900150607550