અત્યારે કવિતાને
કોઈ સમજતું નથી,
સમજે છે
પ્રશસ્તિ
અને એ પણ ગદ્યમાં.
ગદ્યમાં તું આળ-પંપાળનો
આખો પાઠ લખ,
વ્હાલાં – દવલાંનાં નામે આખા પાત્રો ઉમેર.
દરેકના મુખમાં
વાહ! –
નો સંવાદ મૂક,
તો કોઈના મુખમાં
શું વાત છે! –
નું આશ્ચર્ય મૂક.
અનુભવ, વિચાર અને સમજનો ત્યાગ કરીને,
હા-જી હા-જી, જીહજૂર જીહજૂરનો પાઠ કર.
લોકો તો
પાળેલા કૂતરાને પણ
પ્રેમથી
ટુકડો ખવરાવતા હોય છે,
પણ તને
માન, સન્માન, ઈલ્કાબો, ચાંદ, ઇનામો, પુરસ્કાર, ફેંકવામાં આવે છે, ત્યારે –
તારી પૂંછડી બે વળ વધારે લઇને,
વધુ ઊંચી ચડે છે.
તારું મોં એના ગંધાતા ખરડાયેલા પગને ચાટી રહ્યું હોય છે.
ચાટવાની ક્રિયાથી ધરાયેલો દલાલ સાહિત્યકાર,
તને
પગથી હ્યડ! કહીને લાત મારે છે, ત્યારે
તું ફરી પાછો લખવા બેસી જાય છે
ગદ્ય પ્રશસ્તિ!