પર્યુષણ પર્વ નિમિત્તે સહુ મિત્રોને સાદર :
કમ્મગંથી ભલી અંત લગ ઊખલી,
સવ્વ સમકિત થયું ખલભલી ખલભલી.
રક્ત ને કૃષ્ણ આભા બધી ઓગલી,
આપમાં આપ નિર્મલ થઈ ઝલમલી.
દૃષ્ટિલેહા ય તે કૈંક જોજન ચલી,
ધ્યાનની ધવલિમા ધવલિમા ઝલહલી.
જર્જરિત આવરણ ઓર જર્જર થયાં,
જન્મજન્માંતરોની કથા ઊકલી.
દુંદુભિનાદ ને પુષ્પવૃષ્ટિ નભે,
કાઉસગ્ગે ઊભા શ્વાસ આ કેવલી!
27 ઓક્ટો. 1999
સૌજન્ય : "ગઝલ સંહિતા, પંચમ મંડલ ", 'ધિર આઈ ગિરનારી છાયા', પૃષ્ઠ: 88
કેટલાક પ્રાકૃત શબ્દોના મારી સમજ મુજબના અર્થ.
કમ્મગંથી : કર્મગ્રંથી
ઊખલી : ઊખળી
સવ્વ : સર્વ
સમકિત : સમ્યક
દૃષ્ટિલેહા : દૃષ્ટિરેખા
કાઉસગ્ગ : કાયોત્સર્ગ
કેવલ : અનન્ય, વિશુદ્ધ, પરિપૂર્ણ, અંતિમ