ઢાળ મળે તો ગબડી લેવું,
સ્થિર થતાં લગ લથડી લેવું !
વૈતરણી જો તરાય ના તો,
પુચ્છ ગાયનું પકડી લેવું !
અહીંથી ત્યાં રોપાઈ જવાનું,
કોઈ ઉખાડે ઊખડી લેવું !
મંદ વાયરે મર્મરવું પણ,
ખરી ગયા તો ખખડી લેવું !
ગોથ મારીને ઢબતાં છબતાં,
નીલ અધારે ફફડી લેવું !
શાંતિદૂત થઈ ઊડીએ ત્યારે,
મનમાં ધોળું બબડી લેવું !
પછી નિરાંતે થીજવાનું છે,
એ કે' ત્યાં લગ તતડી લેવું !
ભેદ ભેટવાથી જો ટળતો,
માખણકાંડું મચડી લેવું !
હાલ ભલે હંગામી પ્રિયજન,
જામોકામી જકડી લેવું !
3/9/2014