કોઈ સ્થાનક એવાં હોય છે
જ્યાં સ્તુતિ શહાદતની હોય છે,
ત્યાં ચરણરજ માથે ચઢાવી
બસ બાઅદબ ચાલવાનું હોય છે.
સૌજન્ય : “નિરીક્ષક”, 16 માર્ચ 2022; પૃ. 02
અમે અમારા વલણને ચકાસી રહ્યા છીએ.
અમે સ્થિતિ પર ચાંપતી નજર રાખી રહ્યા છીએ.
હાલની પ્રવાહી પરિસ્થિતિમાં
કશું પણ કહેવું વહેલું ગણાશે.
જે ખરબચડાં કવચ પહેરી લેશે,
માર્યા જશે.
જેઓ મહોરાં નહીં પહેરે,
ઓળખાઈ જશે.
જે જેટલાં ખુલ્લાં બનશે,
એટલાં જ બનશે વધ્ય.
શબ્દોમાં સમાઈ શકે એટલી
ગીચોગીચ અસ્પષ્ટતાઓથી જ શોભે
ખરેખરું નિવેદન.
સૌજન્ય : “નિરીક્ષક”, 16 માર્ચ 2022; પૃ. 02
સ્વચ્છસુઘડસુંવાળી શૈયે
નાઇટલેમ્પની લી-લા-શ ઓઢી
ઉજાગરો ઘસઘસા…ટ ઊંઘે!
ગોળગોળ ઘડિયાળી ટક્ ટક્ના અજવાળે
અડખપડખમાં એકબીજીને ચાર દિવાલી આંખો તાકે
નીંદરનાં જીવજંતુ બેસે ઊઠે ઊડે, ઝીણું એવું ડંખે –
– તેના તાતી તરાપ મારી ઝ…પ્ પ્ ગરોળી શિકાર ખેલે!
ઉજાગરો ઘસઘસા…ટ ઊંઘે!
કરોળિયાની સુક્કી – ગંઠાઈ ગયેલી લાળે આખ્ખો બની ગયો છે પંખો!
ચો દિશાએ જાળું રેશમિયા પવનનું ગૂંથે ફરતો ફરતો!
આકાશેથી તારાઓના લૂમ્બ….ઝૂમ્બ ઝૂમખાંઓ તેમાં ઝૂલે!
ઉજાગરો ઘસઘસા…ટ ઊંઘે!
કેફભર્યા પાપણનાં પીણાં પીરસાણાં, તે સુક્કા હોઠ પલાળે;
ખીચોખીચ –
તસુતસુમાં તસતસતું આ હોવું
એકબીજામાં એકમેકને લોપે!
સ્વચ્છ સુંવાળી શૈયામાં સળવળતા સૂરજ ખરબચડા કંઈ ઊગે!
ઊજાગરો દિવાસ્વપ્નોમાં ડૂબે!
૧૧.૦૩.'૨૨