એ લોકો માફ કરી રહ્યા છે.
જરાક સમજવાની વાત છે.
શાંતિ પ્રક્રિયા જરા લંબાઈ જઈ શકે છે.
એમ્યુનિશન્સ, ગન્સ, લૉજિસ્ટિક્સ
આ બધા શાંતિપ્રક્રિયાને અસરકર્તા પરિબળો છે
એના વિશે ફોડ પાડવો હિતાવહ નથી.
શાંતિદૂતો તૈયાર જ છે.
બલકે તેઓ આતુરતાથી રાહ જોઈ રહ્યા છે
નવા આદેશની.
આ દેશથી આ દેશ વચ્ચેના સમયગાળા દરમિયાન
સ્વાભાવિક છે કે તેઓ બહુ ઉત્સુક અને વ્યગ્ર હોય.
જો કે શાંતિ પૈગામ પહોંચાડનાર દરેકે
ધીરજ રાખવીજ રહી.
માફ કરવાની આ પ્રક્રિયા
જરા લંબાઈ જાય તો તે
શાંતિપ્રક્રિયાના હિતમાં જ હશે.
વિનંતી કે
તમને પૂરેપૂરા માફ ન કરી દેવાય
ત્યાં સુધી સબર કરશો.
આકળા થઈને કોઈ અઘટિત વર્તાવ કરશો નહીં.

૭, મુક્તાનંદ સોસાયટી, નર્મદાનગર, જિ. ભરૂચ, ૩૯૨ ૦૧૫

સૌજન્ય : “નિરીક્ષક”, 01 સપ્ટેમ્બર 2021; પૃ. 15

પડી-આખડીને અરીસો બતાવ્યો,
ચીલો ચાતરીને અરીસો બતાવ્યો.

અરીસો અસલ રૂપ દેખાડે તેથી,
ધૂણી ધાખવીને અરીસો બતાવ્યો.

કવિતાથી કોમળ વધુ કંઈ હતું નહિ,
કવિતા લખીને અરીસો બતાવ્યો.

બરાડા ન પાડ્યા, ન ઝંડા ઉપાડ્યા,
ઝીણું ગણગણીને અરીસો બતાવ્યો.

ખમી લે હજારો કટારી, બીજું શું!
મૂરખ, મેદનીને અરીસો બતાવ્યો !

ચકી સાવ નાની અને ઝાડ મોટું,
અદબ જાળવીને અરીસો બતાવ્યો.

હવે તો સજા ભોગવ્યે છૂટકો છે,
ખતા છે ધણીને અરીસો બતાવ્યો.

સૌજન્ય : “અખંડ આનંદ” ઑગસ્ટ 2021

સૌજન્ય : “નિરીક્ષક”, 01 સપ્ટેમ્બર 2021; પૃ. 15

તું છે મારી વાંસળી, હું છું તારો સૂર,
તો ય જગત એવું ખરું કરે અમસ્તા દૂર …

હું છું છુટ્ટી ગંધ ને રખડું છું દિન રાત,
કેદ કરી લે તું મને, થૈ ને પારિજાત !
તો ય અલગ કરશે સખી, દૂર ઊભા અક્રુર …!

હું છું ટીપું એકલું, મારે છે બસ પાંખ,
આંસુ બનવા હું હવે શોધું કેવળ આંખ,
તું જો રોકે ના મને, તો થઉં જમુના પૂર …

મેળામાં ભૂલી પડી, તું ઈચ્છા નોધાર,
હું પણ ખાલી છું હૃદય, પીડા અપરંપાર, 
તું રાધા, હું કૃષ્ણ હઉં, થૈશું એક જરૂર …

000

e.mail : ravindra21111946@gmail.com