અમારે તો કેડી ભલી, રાજમાર્ગ નહીં ફાવે
શેરમાં આ પગલાં કોઈ દિ’ પાછાં નહીં આવે
પાદર સુધી આવ્યુ’તું ખેતર
પણ અમે માન્યા નહીં
લાડવો ખાવા આવ્યા’તા પણ
કાંઈ અમે પામ્યા નહીં
કુટિલતા કોઠે ન પડી, નિર્દયતા નહીં ફાવે
અમારે તો કેડી ભલી, રાજમાર્ગ નહીં ફાવે
તન તોડી બાંધ્યા બંગલા
પરસેવાથી સીંચ્યા રસ્તા
તોયે એક છાપરું ન પામ્યા
એક કોળિયો ધાન ન પામ્યા
પથરા નહીં પીગળે રે, હેત જરા નહીં મળે
શે’રમાં આ પગલાં કોઈ દિ’ પાછા નહીં આવે
સૌજન્ય : “નિરીક્ષક” − ડિજિટલ આવૃત્તિ; 16 મે 2020
