સતત સદંતર ફૂંકાતા બણગા,
પ્રફુલ્લ છાતી, પ્રગટ છે જંઘા.
બધું અનાવૃત થઈને રહેશે,
જુગારી જૂગટે ચડ્યા અઠંગા
ચઢે છે નેવાંનાં પાણી આભે,
જટાથી દરિયે વહે છે ગંગા.
ક્યાં ભાગ્ય છે ને ક્યાં છે વિધાતા?
તલાશે ગુજરાત, ખોજે બંગા.
અશક્ત દૈવત ને દુર્ગ દારુણ,
પધારો શાકંભરી ઓ દુર્ગા!
ઓગસ્ટ -સપ્ટેમ્બર 2022
* શાકંભરી: દુર્ગ નામના રાક્ષસનો નાશ કરવા પાર્વતીએ શિવની આજ્ઞાથી રૂપ ધર્યું હતું. દુર્ગ અથવા દુર્ગમાસુર એણે તપ કરીને બ્રહ્મદેવને પ્રસન્ન કર્યા અને વરદાન માગ્યું કે મને સંપૂર્ણ વેદ આવડે. બ્રહ્મદેવે તથાસ્તુ કહેતાં જ એને સઘળા વેદ આવડી ગયા અને બ્રાહ્મણ માત્રને વેદની વિસ્મૃતિ થઈ. એમ થવાથી યજ્ઞાદિ કર્મ બંધ થઈ ગયાં. દેવોને હષિર્ભાગ મળતો બંધ થવાથી તેમની શક્તિ ક્ષીણ થઈ. તેથી પૃથ્વી ઉપર અનાવૃષ્ટિ થઈ. દુર્ગમે સઘળા દેવોનાં સ્થાન લઈ લીધાં. દેવોએ આદિશક્તિની આરાધના આરંભી. સઘળા દેવો આગળ શક્તિ પ્રગટ થઈ અને વર માગો એમ કહ્યું, પરંતુ અશક્તપણાને લીધે કશું બોલાયું જ નહિ. શક્તિએ પોતાની શતાવધિ આંખોથી દયા ભરેલી દૃષ્ટિએ દેવતાઓ સામે નિહાળ્યું અને પોતાને હાથે તેમને અનેક વનસ્પતિ ખવરાવી તેમની ગ્લાનિ દૂર કરી. આ ઉપરથી શક્તિનું નામ શાકંભરી પડ્યું. પછી શક્તિએ દુર્ગનો વધ કર્યો, એ ઉપરથી શક્તિનું નામ દુર્ગા પડ્યું.
એવો દિવસ નથી ઊગતો જેમાં સ્ત્રીઓને લગતા અપરાધોથી મીડિયા બચી ગયું હોય. નાની છોકરીથી માંડીને કોઈ પણ ઉંમરની સ્ત્રીને દુષ્કર્મનો ભોગ બનાવવાનું સામાન્ય થઈ પડ્યું છે. છેડતી, બળાત્કાર, બીભત્સ ફોટો – વીડિયો વાયરલ કરી દેવાની ઘટનાઓ હવે કશા ય ક્ષોભ કે સંકોચ વગર બહાર આવે છે. પ્રેમી કે બોયફ્રેન્ડ હવે લગ્નની રાહ નથી જોતાં. અંગત પળોનો વીડિયો કે ફોટો પ્રેમી ઉતારે છે ને પ્રેમિકા તે ઉતારવા પણ દે છે ને પછી પ્રેમી તેને વાયરલ કરી દેવાની ધમકી આપી તેનું આર્થિક કે શારીરિક શોષણ કરે છે તો પ્રેમિકા પાસે આત્મહત્યા કરવા સિવાય બીજો કોઈ વિકલ્પ બચતો નથી. પણ, આ બધું ય હવે કોઠે પડી ગયું હોય તેમ એમાં કોઈને કૈં ચિંતા કરવા જેવું લાગતું નથી. આમાં ઘટાડો થતો નથી ને એને સ્વાભાવિક ક્રમમા સ્વીકારી લેવા જેવી ખંધી સ્વસ્થતા સૌએ કેળવી લીધી છે. અનેક પ્રકારે અને રીતે સ્ત્રીઓનો દુરુપયોગ અગાઉ નવી વાત ન હતી ને હવે પણ નથી. પણ આશ્ચર્ય ને આઘાત એ વાતે છે કે શિક્ષણ જેમ જેમ વધતું આવે છે તેમ તેમ એવા અપરાધોમાં ઉત્તરોત્તર વધારો જ થતો જોવામાં આવે છે, ત્યારે પ્રશ્ન થાય કે આવી માનસિકતા આજનાં શિક્ષણનું પરિણામ તો નથી ને? માણસ પણ હવે ઉપયોગનાં સાધનથી વિશેષ કૈં નથી ને શિક્ષણ પણ હવે તેના ઉપયોગની રીતો પૂરી પાડતું હોવાનો વહેમ પડે છે.
Am I alone?