બોલ ફકીરા, શું કરીએ !
કોને દિલનાં દખ કહીએ −
બોલ ફકીરા, શું કહીએ !
માણસને માણસની બીક
ચોગરદમ બળબળતી ખીજ
જોરજુલમ છે ખીચોખીચ
બોલ ફકીરા, શું કરીએ !
ઉપવન ઉપવન ભડકે અાગ
છે પુષ્પોની ભાગાભાગ
પંખીડાંનો માળા ત્યાગ
બોલ ફકીરા, શું કરીએ !
ક્યાંના વાદળ, ક્યાંની છાંય
ધગધગ સૂરજ, શિર શેકાય
રસ્તા ‘ખાઉં − ખાઉં’ થાય
બોલ ફકીરા, શું કરીએ !
કેવા હક ને ક્યાંનો ન્યાય
જ્યાંત્યા ચૌદશિયા ભટકાય
ઠાંસી દે જીવનમાં લાય
બોલ ફકીરા, શું કરીએ !
ખુરશીનો જાદૂઈ ખેલ
અવળી ઘાણી, અંધા બેલ
નીકળતું લોકોનું તેલ
બોલ ફકીરા, શું કરીએ !