ભગવાન હશે પથ્થર જેવો, તમે પથ્થર ને પથ્થર રાખો.
ના માને એને જાવા દ્યો, બકા, ઇશ્વર ને ઇશ્વર રાખો.
ખોટાં, જે બેઠાં શીખર એમને નીચે લાવી શું કરશો?
ઓચિંતા પડશે એક દિવસ, ભલે અદ્ધર ને અદ્ધર રાખો.
ખોટું તો થાવાનું પળપળ, છતાં સાચાંનો આગ્રહ રાખો.
જુઠ્ઠાનો છો ઢોલ વગાડો છતાં નક્કર ને નક્કર રાખો.
સરહદ રક્ષણે યુદ્ધો લડવા પડે, ગરમી, ઠંડી વર્ષામાં,
લાભ નથી હૂસાતૂસીમાં અરે! લશ્કર ને લશ્કર રાખો.
ફૂલો પીસીને ન છિપાવો તરસ સુંદરતાની સાથીઓ,
કુદરતની ગતિ ન્યારી છે, છો તમે અત્તર ને અત્તર રાખો.
ઘોળીને પી જવી છે, ધરાવો ડિગ્રી.
બહુ તડપાયા હવે તો બતાવો ડિગ્રી.
નેતા થાવા હશે ફરજિયાત ય ડિગ્રી,
સાચી જે હોય શાને છુપાવો ડિગ્રી.
ઉલ્લુ છે આ પ્રજા, ઠોક ભાષણબાજી,
ફાવે તે ફોર્મમાં બસ લખાવો ડિગ્રી.
ચાલે છે ને અહીં ચાલશે બહુમત બસ,
ઊંચો હોદ્દો મળે તો ફગાવો ડિગ્રી.
સીલેબસ, યુનિવર્સિટી ને ડિગ્રી જૂઠી,
સત્તાના તૉરમાં બસ ચલાવો ડિગ્રી.
ઓરીજીનલ પ્રમાણો બતાવ્યા ખાસ્સા,
તેથી આ નોકરી, ખાસ લાવો ડિગ્રી.
મળતી ના નોકરી, થાય નાહિમ્મત જો,
કિસ્સા હો આપઘાતો, જલાવો ડિગ્રી.
નગરી અંધેર છે, આજ ગંડું રાજા,
શોધો મૂરખ ને ફાંસી ચડાવો ડિગ્રી.
સબ સલામત, બણગાં ફૂંકો.
ખાક હાલત, બણગાં ફૂંકો.
ખોટ દુનિયાભરનો નાતો,
જૂઠ દાનત, બણગાં ફૂંકો.
શોખ રેલીનો જબરો છે,
સ્પીચ લાનત, બણગાં ફૂંકો.
લોકશાહીમાં વોટો છે,
સૌ અનામત, બણગાં ફૂંકો.
તોડ ઈજારો, જો થાતી
વારસાગત, બણગાં ફૂંકો.
આ કલાકારો છાપેલાં,
કાટલાં વત, બણગાં ફૂંકો.
સંવિધાની સૂઝાવો પણ,
હો અમાનત, બણગાં ફૂંકો.