ઘરની
બહાર
અરધો ફૂટ
જમીન દબાવનારનું
ડિમોલેશન થઈ જાય છે.
એ લોકો
કહે છે
કાશ્મીર
આપણું છે.
સૌજન્ય : “નિરીક્ષક”, 01 ડિસેમ્બર 2021; પૃ. 15
એક હતો રાજા.
એણે
જેની હત્યા કરવી હોય
એને
કોઈ ગુનામાં પકડતો
અને પછી
ફાંસીની સજા
આપી દેતો.
વાર્તા પૂરી.
સૌજન્ય : “નિરીક્ષક”, 01 ડિસેમ્બર 2021; પૃ. 15
શાસક ક્યારે શોષક બને
એનું કોઈ ગણિત નથી.
જાતરખોપા બાજુ પર મુકાય
કોઈનો ચહેરો ઓઢીને લોક બધું
રમતમાં જોતરાય,
આંખોમાં ટીવી પડદો આંજી
અંજાઈ જાય,
ફ્રેમમાં મઢાયેલાં દૃશ્યો
હકીકત મનાય,
ઇતિહાસની સચ્ચાઈને
અસતનો વરખ ચડાવી
સમસ્ત પ્રજાને ભરમાવાય
કશાં લેખાંજોખાં ના થાય.
શાસકને એની ખુરશી
અદકેરી અને કાયમી લાગે
શાસકની આ વરવી વર્તણૂંકને
રોકે
કે ટોકે
એ બધું ય વંઠી જાય
પછી બીજું શું થાય?
તો પણ
આ કંઈ ગણિત નથી
શાસકના શોષક થવાનું
એટલું જો સમજાય
તો …..
સૌજન્ય : “નિરીક્ષક”, 01 ડિસેમ્બર 2021; પૃ. 02