જે લોકો
પુનર્જન્મમાં માને છે
એમાંથી
એકવીસમી સદીમાં મર્યાં
એ
વિરોધી ધર્મમાં જન્મે છે.
પહેલા ગાળો આપતા હતા,
હવે
ગાળો ખાય છે.
સૌજન્ય : “નિરીક્ષક”, 16 જુલાઈ 2021; પૃ. 16
દેશની ભૌમિતિક આઝાદી,
ભોગવે છે પથિક આઝાદી.
કોઈ માટે જરીક આઝાદી,
કોઈને છે અધિક આઝાદી.
હોય દેશી પ્રજા અને રાજા,
આ થઈ વાસ્તવિક આઝાદી.
જેમને છે અહીં કલામાં રસ,
માણવાના રસિક આઝાદી.
દેશમાં કેદ થઈ જતી લાગે,
એવી છે આંતરિક આઝાદી.
રાતના ઊંઘ આવી જાય અને
જેને સમજે શ્રમિક આઝાદી.
સૌજન્ય : “નિરીક્ષક”, 01 જુલાઈ 2021; પૃ. 13
આબાદ રહેવી જોઈએ
વસ્તીઓ આબાદ રહેવી જોઈએ,
સૃષ્ટિ ઝિંદાબાદ રહેવી જોઈએ !
લોહીથી ખરડાયેલા ઇતિહાસની,
એ કથાઓ યાદ રહેવી જોઈએ !
લોકશાહી એટલે સરકાર નહીં,
વ્યક્તિઓ આઝાદ રહેવી જોઈએ !
ઇચ્છીએ પણ એવું તો ક્યાં શક્ય છે,
ના કોઈ ફરિયાદ રહેવી જોઈએ !
કોઈ મર્યાદા વિકસવાની નથી,
તે છતાં મરજાદ રહેવી જોઈએ !
ધરતીના ટુકડાઓ પાડી નહીં શકો,
અહીં બધી ઓલાદ રહેવી જોઈએ !
•
એક છે
રાષ્ટ્રવાદી, કોમવાદી એક છે,
શબ્દની આ ચાલબાજી એક છે !
આમ તો વસ્તી ઘણી છે ગામની,
કંઈક હાજી છે ને કાજી એક છે !
પ્રશ્ન છે સાંપ્રત સમયનો એક આ,
લોકશાહી છે ને ગાદી એક છે !
છે જુદા કૂવા, જુદાં છે માટલાં,
વરસતાં વાદળનાં પાણી એક છે !
કઈ રીતે એને અલગ ગણશો તમે,
બેઉ આંખોનું પ્રવાહી એક છે !
•
ઍક્ટિવિસ્ટ હું
હા, ખરેખર એમ ઍક્ટિવિસ્ટ હું,
તું અનુચર એમ ઍક્ટિવિસ્ટ હું !
ત્રાજવાં સરખાં સહુનાં રાખતો,
જેમ ઈશ્વર એમ ઍંક્ટિવિસ્ટ હું !
એ કહે તે સાંભળી લે તું બધું,
આપું ઉત્તર એમ ઍંક્ટિવિસ્ટ હું !
ગાંધીજીની લાકડી જેવો ભલે,
તો ય આખર એમ ઍંક્ટિવિસ્ટ હું !
પગ મને પૂછીને ચાલે છે હજી,
મારી ભીતર એમ ઍંક્ટિવિસ્ટ હું !
કોઈના શ્વાસે નહીં જીવી શકું,
ધડકનો પર એમ ઍંક્ટિવિસ્ટ હું !
તારી ચિંતા તારે નહીં મારે જ છે,
તું કબૂતર એમ ઍંક્ટિવિસ્ટ હું !
સૌજન્ય : “નિરીક્ષક”, 01 મે 2021; પૃ. 14