આખે આખો બળીને ખાખ થઇ ગયો છું હું અહીં
બાળવા સ્મશાનમાં ક્યાં લઇ જાઓ છો ભલા, તમે મને
સિતમો વેદના વ્યથાનો સીલસીલો ચાલુ રહ્યો જીવનમાં, મારા સતત
દોસ્તો, હવે તો કલમ પણ ટૂંકી પડે છે મારી
કેટકેટલું લખવું મારે હવે ?
હરિયાળી દાસ્તાન અને ઝળહળતો પ્રકાશ દીસે મારી આસપાસ ચોપાસ
પણ, સામે કાંઠે અંધારપટ છવાયો છે પેલા વાસમાં હરહંમેશ નિરંતર
આ ઝળહળતા પ્રકાશને શું કરવો મારે હવે
સુખ તો ચારેકોર છવાયું છે મારા આંગણમાં હવે, ક્રમબદ્ધ અવિરત
એ સુખને શું કરવું મારે, હવે જ્યારે પેલો
માણસ ભૂખ્યો સૂતો છે ફૂટપાથ પર સામે મારી
ક્યારે ઊગશે એમની સવાર એ વિચારે ચગડોળે ચડી જાઉં છું હું
અને આમ જ પૂછી લઉં છું મારી જાતને હવે કે
ક્યાં છે પેલા ગાંધી, માર્કસ અને લેનિન
જેણે સમરસતા સ્થાપવાની વાત કરી હતી
જવાબ આમ જ મળી જાય છે મને એવો કે આ મહાપુરુષો
કેદ છે તેમના પુસ્તકોમાં હરહંમેશ
ઊઠો જાગો સૌ કોઇ હવે પેલા ગાંધી, માર્કસ અને લેનિનને
કાઢો બહાર તેમના પુસ્તકોમાંથી
સમરસતાનાં ઘેર ઘેર વગાડો બ્યુગલ સૌ કોઇ
આગ થઇ ભડકો થાય ત્યાં સુધી

તા. ૩-૨-૨૦૦૯

e.mail : koza7024@gmail.com

ચીમળાઇ ગયેલું મોઢું, નિર્દોષ ચહેરો,
ટ્રેઇનમાં પથરાના વાજીંત્ર સાથે, ભીખ માંગતા,
ગીતગાતાં ભૂલકાંઓ –
કિશોરાવસ્થામાં વૃદ્ધ દેખાતાં ચિથરેહાલ
અનેક ચહેરા-સ્વઅસ્તિત્વની લડત લડતાં
ભીખપર નભતા અનેક કુટુંબો –
શિયાળાની કડકડતી ઠંડીમાં ફૂટપાથ પર
થીજી જાતાં માનવસ્થંભો –
ગંધાતી ગટરોને રહેઠાણ બનાવી જીવતાં
માનવ સમૂહો –
ખુલ્લે આમ મસાજ કેન્દ્રોનાં નામે ચાલતાં
વૈશ્યાગૃહો –
આ આઝાદ ભારતની વાત છે –
જ્યાં લોકશાહી છે – સમાજવાદ લાવવાની
થોકબંધ વાતો થાય છે – વીસ મુદ્દા અને
બીજા પાંચ મુદ્દાની વાત કરી આર્થિક
ઉદ્ધારની ગુલબાંગો પોકારી જ્યાં ખાદીધારી
નેતાઓ ભાષણ કરતાં થાકતા નથી –
અને તેમ છતાં પણ એની – એ જ સ્થિતિ –
આ છેવાડાનાં રક્તવિહીન હાડપિંજરનાં
માનવ સમૂહોને અમે વર્ષોથી જોઇએ છીએ ત્યારે –
અમને કશું જ સુઝતું નથી –
સિવાય – બસ એક ચીનગારી – તેમાંથી ફેલાતો
વિસ્ફોટ – તોફાન – આંધી – ઉલ્કાપાત
અને તેમાંથી પરિણમતી લાલક્રાંતિ
અને પછી તેમાંથી રચાતી શોષણવિહીન સમાજ રચના
બસ એની રાહમાં અને રાહમાં
અમે દિવસો વિતાવી રહ્યા છીએ
પડ્યા પડ્યા આજ પણ
અહીં એકલા અટુલા
પછી ભલે અમે તદ્દન ક્ષીણ થઇ ગયા હોઇએ.

૭ એપ્રિલ, ૧૯૯૨

e.mail : koza7024@gmail.com

ઝળહળે ગામ આખું ઝળહળે
પણ કોઇ ખૂણે વાસમાં દીવો મુરઝાતો જોવા મળે,
ગામ, પાદર, સીમ, ચોરો, શ્વાસ લેતું જોવા મળે,
પણ છેવાડે પેલા વાસમાં જીવન રીબાતું જોવા મળે,
નદી વૃક્ષ મંદિર ઘટાટોપ વનરાઇ બધું અહીં હેમખેમ જોવા મળે,
પણ બાળ પેલી છેવાડાની વસ્તીમાં સૂનમૂન જોવા મળે,
વિકાસની વાતો કરી ચોરો આખો હરખાયા કરે,
પણ છેક છેવાડે પેલા વાસનું જર્જરિત ઝૂંપડું અભાવોની સાક્ષી પૂરે,
ભાવભીનું હરખઘેલું સ્વાગત થાય તમારું ગામમાં,
પણ વાસનો એ માણસ, માણસમાંથી લોપાતો જોવા મળે,
સાવ સઘળું, સૌનું બધું અહીં હેમખેમ જોવા મળે,
પણ એ માણસનું પેલા વાસમાં કશું કાંઇ ન જોવા મળે,
ઝળહળે ગામ આખું ઝળહળે,
પણ એકાદ ખૂણે વાસમાં દીવો મુરઝાતો જોવા મળે.

તા. ૧-૬-૨૦૧૪

e.mail : koza7024@gmail.com