આણંદ કહે પરમાણંદા, કોરોનાનો કેર,
નિયમ કાયદા છો ઘડયા, બંદા ઠેરના ઠેર.
સૌજન્ય : “નિરીક્ષક” − ડિજિટલ આવૃત્તિ; 18 મે 2020
વૈશાખની ક્રુદ્ધ બપોરનો સન્નાટો
તાપ અને તાપ સિવાય
ક્યો બાપ નવરો હોય અટાણે?
હા, થોડે દૂર ભઠ્ઠીમાંથી ઉકાળેલો ડામર
ડોલથી ભરી ભરી રસ્તા પર પાથરતાં
મજૂરો છે
રસ્તા પર તો મજૂરો જ હોય ને?
એમનું આમ હોવું અને
આ માથાફોડ તાપને એક અકસ્માત ગણો.
પ્લાસ્ટિકનાં ધગી ગયેલાં ચપ્પલોનો ફટક્ ફટક્ ફટકાર
રસ્તાના સૂનકારને જરી જરી ટપારે છે.
થોડેક દૂર રસ્તા પરનાં એક માત્ર ઝાડ હેઠ
મુકાદમે બીડી સળગાવી લીધી છે.
એક લારીની આડશે
એક-બે ખોયાં બંધાયેલાં છે.
ઉકળતા ડામરની તીવ્ર વાસથી
ભીંસોભીંસ થઈ ગયેલો રસ્તો
ફરી દોડતો થઈ જશે …
હાલ તો
અનેક અનેક અનેક બપોરને
એક સામટી સળગાવી નાખવાના તોરમાં
ધગી રહેલા સૂરજની
સામે પડ્યાં છે આ માથાકૂટિયા મજૂરો
સૌજન્ય : “નિરીક્ષક” − ડિજિટલ આવૃત્તિ; 18 મે 2020
અમે રેલાવેલા પરસેવા
આખર આજે
અમારા ગળે ગાળિયો થયા
સદીઓનું વાવેલું ઊગ્યું નહીં.
આને જ કહેવાય
'કિલ ઇન ઇન્ડિયા'?
ટાંટિયા તાણતાં, સાઇકલ ઢસડતાં
દેશે અને રાજાએ
અમારા ફોટા દિવસરાત જોયા.
બધું અજગર જેવું.
કોણ જાણે કેટલામે દહાડે
કેડમાં ને ખભે છોકરાં લઈ આવ્યાં
પાદરમાં જ અમે ઢગલો થયાં
કોઈ મર્યાં તો
કોઈ ઘરખેતર ભેગાં થયાં.
હજુ હજારો લોક
વાટમાં ચાલે ને શેકાય.
દેશદેશાવરથી રાજાએ
બધાં વહાલાં લાવી દીધાં
વાજતેગાજતે
અમને કોણ સંભારે?
મહામારી મટે
પછી પાછાં શીદ જઈએ?
ચપટી મીઠું ને ફાડ રોટલો ખાઈને
સત્યાગ્રહ કરીશું.
એમ કહેનારાં ને કરનારાં
આપણે દેશદ્રોહી ઠરશું
ન્યાયના લડવૈયા થયા તો
અર્બન નક્સલી ઠરશો
તો ભલે એમ જ થાઓ
સૌજન્ય : “નિરીક્ષક” − ડિજિટલ આવૃત્તિ; 16 મે 2020