આંસુનાં ઈંધણની એવરેજ તો જુઓ
દર્દીલી સડક પર રઝળપાટ તો જુઓ
ભૂખ, રોગ ને અકસ્માત સ્પર્ધામાં છે
દરિદ્રના પ્રાણની ડિમાન્ડ તો જુઓ
સૌજન્ય : “નિરીક્ષક” − ડિજિટલ આવૃત્તિ; 30 મે 2020
કોરોનાએ
તોડી નાખી
ચાતુર્વર્ણની વાડ.
સદીઓ પુરાણી વાડ !
સૌને કર્યા અસ્પૃશ્ય !
એક મેકથી દૂર !
ઘરમાં તાળાબંધ !
હવે
ન કોઈ સ્પૃશ્ય
ન કોઈ અસ્પૃશ્ય
કિંતુ
સર્વ કોઈ અસ્પૃશ્ય !
સર્વ સમાન !
સૌજન્ય : “નિરીક્ષક” − ડિજિટલ આવૃત્તિ; 29 મે 2020
નવના ટકોરે
રોજ સવારે
એક મા
ડોરબેલ વગાડે છે !
લોકડાઉનમાં બારણે
એક જ તો
બેલ વાગે છે
રોજ !
મોઢે ઢાંકણ
આંગળીએ
બે સંતાનો
હાથમાં ઝાડુ !
નીડર છે
પણ ચૂપચાપ
કોરોનાને
હરાવે છે રોજ !
ઘરમાં જ રહો
કહેનારાઓનું અને
ઘરમાં જ રહેનારાઓનું
ઘર ચોખ્ખું કરે
રહીને ઘર બહાર !
કોરોના જશે
ઘરબાર ખુલશે
પણ એ મા
રોજ પાછી
બારણે
નવના ટકોરે !
સૌજન્ય : “નિરીક્ષક” − ડિજિટલ આવૃત્તિ; 29 મે 2020