હમણાં હમણાં
શું થયું છે આપણા આ ટી.વી.ને?
એકાએક મજૂરો જ બતાવવા માંડયા છે?
ટોળેટોળાં મજૂરો, કરગરતાં મજૂરો
રમણે ચઢેલાં મજૂરો
144 અને સોશિયલ ડિસ્ટન્સીંગની
ઐસીતૈસી કરી,
ખભે મેલાઘેલાં છોકરાં,
બચીખૂચી ઘરવખરી લૈ
ચાલવા જ માંડયા છે!
ગોધરિયાં અને ભૈયાઓ બધાં ય …..
ફાડ્યાં, સમજતાં જ નથી,
શું દાટ્યું છે ત્યાં ઘરોમાં?
અહીં મફ્ફતનું ખાવાનું તો
દાનેશ્રીઓ આલે છે!
ટી.વી.ની એન્કર, સરકારી પ્રતિનિધિ
માસ્ક સાથે મૅચિંગ સાડી-ડ્રેસ પહેરીને
મજૂરોને પ્રધાનમંત્રીએ આપેલો
'આત્મનિર્ભર બનો'નો સંદેશ આપી રહ્યાં છે!
હીરાની ઘંટીઓ સૂની પડી છે,
સૂની પડી છે મકાનો બનાવતી ક્રેઈન
સૂની પડી છે પાવરલૂમ્સના
સાંચાઓની ઘરઘરાટી!
નથી ખુલતા ટાઢા છાંયે ટિફિન રિક્ષાવાળાનાં!
આ તો ચાલી નીકળ્યા છે
કીડીની વણઝારની જેમ
'હમ મહેનતકશ દુનિયાવાલોંસે' જેવી
ફૈઝની ગઝલની એને ખબર જ નથી!
અરે! એને એ ય ખબર નથી કે
આજે તો એનો જ દિવસ છે!
એને તો એટલી જ ખબર છે કે
એનો તો દિવસ ક્યારે ય ઊગ્યો જ નથી!
એના ભાગે તો આવી છે
કાળીડિબાંગ રાત જ!
લૉક ડાઉનના તાળાનું વજન
પેટની હોજરી પર વધતું જાય છે
ને એમ જ ચલાતું જાય છે,
દૂર દૂર સુધી!

સૌજન્ય : “નિરીક્ષક” − ડિજિટલ આવૃત્તિ; 03 મે 2020

મહામારીના આ કપરા કાળમાં જ્યારે ખરેખરા સુખદ સમાચાર જવલ્લે જ સાંભળવા મળે છે, ત્યારે રણમાં મીઠી વીરડી જેવા બે સમાચાર તબીબી વિજ્ઞાનની અટારીએથી આવ્યાં છે. SARS-CoV-2 વિષાણુ સામે રોગપ્રતિકારકતા આપતી રસી માટે સમસ્ત વિશ્વ તલસી રહ્યું છે. જગત આખાના રસીકરણ શાસ્ત્રના વિજ્ઞાનીઓ આ રસીની શોધ માટેની મૅરેથોન દોડ જાણે ૧૦૦ મીટરની સ્પ્રિન્ટની ઝડપે દોડી રહ્યાં છે. સામાન્યત: એક રસીના સંશોધન માટે ૧૦ થી ૧૫ વર્ષ તો ઓછામાં ઓછાં લાગી જાય છે. HIV, મેલેરિયા, ડેંગ્યૂ જેવા કેટલા ય રોગો માટેની રસી તો વર્ષોનાં સંશોધન બાદ હજી સુધી પૂર્ણપણે વિકસાવી શકાઈ નથી. Covid-19 વિરુદ્ધ હાલમાં ૧૦૦થી પણ વધુ સંભવિત રસીઓ સંશોધનના અલગ અલગ તબક્કામાં છે. તે પૈકી ઑક્સફોર્ડ વિશ્વવિદ્યાલયની જૅનર ઇન્સ્ટિટ્યૂટ દ્વારા વિકસાવવામાં આવેલ રસી સૌથી પ્રબળ દાવેદાર છે. આ એડવર્ડ જૅનર એ જ અંગ્રેજ તબીબ જેમણે smallpox-શીતળા-ની રસી, એ જ વિષાણુના પિતરાઈ એવા cowpox-ગાયમાં થતો અછબડા જેવા રોગ-માંથી શોધી કાઢી હતી. રસીકરણની શોધથી તબીબી ક્ષેત્રે નવો જ આયામ આલેખનાર એડવર્ડ જૅનરના માનસ-વારસદાર જેવા આ સંસ્થાના સંશોધકોએ આજે આ નવા દૈત્ય સામે બાંયો ચઢાવી છે. પ્રો. એડ્રીઅન હિલ અને પ્રો. સારાહ ગિલ્બર્ટના માર્ગદર્શન હેઠળ પાછલા બે-ત્રણ દશકમાં મેલેરિયા, MERS, ઇબોલા સામેની રસીની શોધ ક્ષેત્રે આ સંસ્થાનું નોંધપાત્ર યોગદાન રહ્યું છે.

પરંપરાગત રીતે રસી બનાવવા માટે જે તે વિષાણુના નબળા પાડવામાં આવેલ સંસ્કરણનો ઉપયોગ કરવામાં આવે છે. શરીરમાં આવી રસી દાખલ થતાંની સાથે જ તે વિષાણુ વિરુદ્ધના રોગપ્રતિકારક પ્રતિસાદની ચાંપ ચાલુ કરી દે છે. એ પછી જો સબળો વિષાણુ પણ શરીર પર હુમલો કરે તો, પહેલેથી સુસજ્જ પ્રતિદ્રવ્યો(antibodies)નું દળકટક તેમને ઊગતા જ ડામી દે. જો કે હાલમાં રસી બનાવવા સારુ નવીન અભિગમનો ઉપયોગ કરવામાં આવ્યો છે. ચિમ્પાન્ઝીના શ્વસનતંત્રમાં જોવા મળતા બીજી જાતના વિષાણુને અલગ તારવીને નિષ્ક્રિય કરવામાં આવ્યો. ત્યાર બાદ આ વિષાણુને SARS-CoV-2ના વાઘા પહેરાવાયાં છે. મૂળે તો આ રસી SARSના પિતરાઇ એવા MERS —મિડલ ઇસ્ટ રેસ્પિરેટરી સિન્ડ્રોમ — સામે લડવા માટે વિકસાવાઈ હતી, જેનાથી ૨૦૧૨માં અખાતી દેશોમાં રોગચાળો ફેલાયો હતો. ૨૦૧૯ના અંત ભાગથી શરૂ થઈને ચીનમાં નવતર (novel) કોરોના વાઇરસ અને તેનાથી થતો શ્વસન તંત્રનો ગંભીર રોગ કૂદકે ને ભૂસકે ફેલાતાં ત્યાંના સંશોધકોએ ૨૦૨૦ના ફેબ્રુઆરી માસમાં તેના જનીનિક બંધારણને અનુક્રમિત કરી વિશ્વ સમક્ષ જાહેર કર્યું. જૅનર સંસ્થાના સંશોધકોએ ત્યારથી જ MERS સામેની રસીમાં જરૂરી સુધારાવધારા કરી covid-19 માટેની રસી બનાવવાની પરિયોજના હાથ ધરી. તે સમયે પારકા દેશમાં માત્ર સ્થાનિક સ્તરે ફેલાયેલા આ નવીન રોગ માટેની રસી વિકસાવવાનું નાના પાયે શરૂ થયેલું કામ આજે માત્ર બે મહિના બાદ ભયંકર મહામારીના કાળમાં વિશ્વ આખાને આશા આપી રહ્યું છે.

જનીનિક દ્રષ્ટિએ માનવીના સૌથી નજીકના સગા એવા રહીસસ મકાક વાંદરા પરના પ્રયોગોમાં આ રસીએ એકધારાં પરિણામ આપ્યાં છે. રસી અપાયા બાદ મોટી માત્રામાં વિષાણુના સંસર્ગમાં આવવા છતાં આ વાંદરાઓને Covid-19નો ચેપ લાગુ ન પડતાં તેનાં મનુષ્યપરીક્ષણ ચાલુ કરવામાં આવ્યા છે. પહેલા તબક્કામાં ૧,૧૦૦ મનુષ્યો પર 'ડબલ બ્લાઇન્ડેડ, રેન્ડમાઇઝ્ડ, પ્લસીબો કંટ્રોલ્લ્ડ' ઢબે તપાસ ચાલી રહી છે. આ ઢબે થતાં પરીક્ષણોથી મળતાં પરિણામ તબીબી વિજ્ઞાનમાં સૌથી વધુ માન્ય ગણાય છે. આ તબક્કામાં રસીની વિષાણુ સામે રોગપ્રતિકારકતા આપવાની એટલે કે પ્રતિદ્રવ્યોનું ઉત્પાદનચક્ર ફરતું કરવાની શક્તિ ઉપરાંત રસીની સલામતી અને સહ્યતા પણ માપવામાં આવે છે. અમેરિકાના FDA-ખાદ્ય અને ઔષધ નિયામકતંત્ર-એ મહામારીના કાળમાં સમયની કિંમત અને રસીના મહત્ત્વને ધ્યાનમાં રાખીને ત્વરિત ગતિએ આગળ વધારવા મંજૂરી પણ આપી દીધી છે. બહુરાષ્ટ્રીય સહયોગમાં સંશોધનનો આ આગામી તબક્કો પાંચ હજારથી પણ વધુ મનુષ્યો પર મે મહિનાના અંત પહેલા શરૂ થવાનો છે. જો એ તબક્કો પણ સફળ નીવડે તો સપ્ટેમ્બર મહિના સુધી આ રસીના વ્યાપક જાહેર ઉપયોગ માટેની મંજૂરી મળી શકે છે. જૅનર સંસ્થાએ પહેલેથી જ ચોખવટ કરી છે કે વિકટ સમયમાં નફાખોરી રોકવા તે આ રસી બનાવવાના અને વેચવાના વિશિષ્ટ અધિકારો કે પેટન્ટ કોઈ એક કંપનીને વેચશે નહીં. એશિયા અને યુરોપની કુલ ૬ કંપની અત્યારથી આ 'સંભવિત' રસીના ઉત્પાદન માટે કમર કસી ચૂકી છે. વિશ્વમાં રસીઓની સૌથી મોટી ઉત્પાદક અને નિકાસકર્તા એવી સીરમ ઇન્સ્ટિટયૂટ ઓફ ઇન્ડિયા પણ તે પૈકીની એક છે. ઊલટું, આ સંસ્થાએ તો જાહેર કર્યું છે કે તે કેટલીક માત્રામાં આ રસીનું આગોતરું ઉત્પાદન પણ કરશે, જેથી જો સપ્ટેમ્બરમાં રસીના ઉપયોગની મંજૂરી મળી જાય તો વિના વિલંબે જરૂરતમંદ લોકો સુધી રસી પહોંચતી કરવાનું શરૂ કરી શકાય. આ ‘જો’ અને ‘તો’ની મારામારી ખૂબ મોટા પ્રમાણમાં પૈસા અને સંસાધનોનું રોકાણ માંગી લેશે.

કોરોના વાઈરસની બીમારીને રોકવાની રસીની વાત તો જાણી, પરંતુ સાથોસાથ આ રોગ જેમણે લાગુ પડ્યો હોય તેમની સારવાર સારુ એક સંભવિત દવા 'રેમડેસીવીર' માટે પણ હાલમાં જ શુભંકર સમાચાર પ્રારંભિક પરીક્ષણોમાં બહાર આવ્યા છે. મૂળે ઇબોલા વિષાણુ સામે લડવા માટે વિકસાવવામાં આવેલી આ દવા કોરોના વાઇરસના અતિ ગંભીર ચેપમાં પણ આ વાઈરસને શરીરમાં વિનાશક અસર કરતા અમુક હદે રોકી શકે છે, એવાં સ્પષ્ટ હકારાત્મક પરિણામ મળ્યાં છે. થોડા જ સમયમાં તે અંગેની વિગતવાર માહિતી જાણવા મળશે. અત્યાર સુધી અભેદ્ય મનાતા કોરોના વાઈરસ સામેનો રામબાણ ઇલાજ તો તેને ન કહી શકાય, પરંતુ તેની સામે ઝઝૂમતાં દરદી અને ડૉક્ટર બેયના ભાથામાં એક તીર આથી ખસૂસ ઉમેરાયું છે. સઘન તબીબી પરીક્ષણો પછી કદાચ એમ પણ જાણવા મળે આ રસી કે આ દવા SARS-CoV-2 વાઈરસ સામે સંપૂર્ણ રક્ષણ આપવા પૂરતાં નથી. પરંતુ એથી કાંઈ વૈજ્ઞાનિકો હથિયાર હેઠાં નહીં મૂકી દે. બલકે ભવિષ્યના હથિયાર વધુ ને વધુ તીક્ષ્ણ બનાવવાના પ્રયત્નો બીજા જ દિવસથી આદરી દેશે.

માણસાઈની વ્યાખ્યા બીજાં જીવો પ્રત્યેની અનુકંપા સુધી સીમિત હોય એમ હું નથી માનતો. ગમે તેવી વિકટ પરિસ્થિતિમાંથી પણ પોતાના બુદ્ધિચાતુર્ય વડે મારગ કાઢવો અને મારગ ના નીકળે ત્યાં સુધી અથાક ઝઝૂમતા રહેવું એ ગુણધર્મો ઉત્ક્રાંતિ દ્વારા જૈવિક પિરામિડમાં કાળક્રમે ઉત્તરોત્તર ઉપર ચઢેલી માણસજાતના હાડમાં ઊતર્યા છે. આ વાઇરસ સામે જરૂર જીતાશે, કોઈ દૈવી કૃપા કે ચમત્કારથી નહીં, પરંતુ આવી 'વિચક્ષણ અને ખંતીલી માણસાઈ'થી જ. અને તેથી જ તેના અનેક દોષ-નબળાઈ છતાં આ મનુષ્યત્વ પ્રત્યેનો મારો આશાવાદ અકબંધ છે.

e.mail : durgeshmodi@yahoo.in

સૌજન્ય : “નિરીક્ષક” − ડિજિટલ આવૃત્તિ; 03 મે 2020

શિકાગો ખાતે 1884માં સંગઠિત વ્યાપાર સંઘ અને મજૂર મંડળની (Federation of Organised Trades and Labour Unions) પરિષદમાં ઠરાવાયું હતું કે પહેલી મે, 1886એ તેમ જ ત્યાર બાદ શ્રમિક માટે 8 કલાકનું કામ કાયદાકીય રીતે એક દિવસનું કામ ગણાશે. 135 વર્ષ બાદ મુંબઈમાં બાંધકામ કરતા કડિયા સાથે કામ કરતો એક શ્રમિક પહેલી મેના થોડા દિવસ પહેલાં 1,400 કિલોમીટરની પગપાળા મુસાફરી કરી ઉત્તર પ્રદેશના શ્રાવસ્તી જિલ્લામાં તેના વતન મથકન્વા ગામમાં પહોંચે છે. તેને અલગ રખાય છે અને ત્યાં જ તે મરણને શરણ થાય છે. ભાગ્ય તો જુઓ! માતા-પિતાએ તેનું નામ પાડ્યું હતું ઇન્સાફઅલી. અલીના અંદાજ અનુસાર, બાકી રહેલા પાંચ હજાર રૂપિયા તેને માયાનગરી મુંબઈમાં તાળાબંધી બાદના સપ્તાહો દરમિયાન ટકી રહેવા સારુ પૂરતા ન હતા. આ એક જ અલી સરકાર અને સમાજ પાસેથી ઇન્સાફ માગી રહ્યો નથી. એ તો તનતોડ મજૂરી કરીને પેટિયું રળતા લાખો મજૂરોની દર્દનાક હાલત અને તેમની યાતનાઓનું પ્રતિનિધિત્વ કરે છે.

મે માસના પ્રારંભે બે પ્રશ્ન આપણી સહુની સમક્ષ વિકરાળ જડબાં ફાડીને ઊભાં છે : હિંદુસ્તાનમાં આજે શ્રમિક ક્યાં છે અને જાતમહેનતનું, બીજા શબ્દોમાં, શ્રમનું ગૌરવ ક્યાં અદૃશ્ય થયું છે? બીજો મુદ્દો, જાન સાથે જહાનનો. અર્થકારણનું શું કરીશું?

અમેરિકામાં 1884માં થયેલી ઐતિહાસિક ક્રાંતિ બાદ વ્યાપાર અને શ્રમિક સંઘો ફૂલ્યા-ફાલ્યા. હિંદુસ્તાનના વ્યાપાર અને મજૂર સંઘોના ઇતિહાસમાં ભરતી-ઓટ આવ્યાં છે. ઉદ્યોગ અને સેવા ક્ષેત્રનાં ઉત્પાદનમાં સંગઠિત શ્રમનો હિસ્સો 20 ટકાથી વધ્યો ન હોવાનું દર્શાવતા અર્થશાસ્ત્રીય અભ્યાસોથી અલમારીઓ ભરાઈ ગઈ છે. અસંગઠિત તથા સ્વ-રોજગાર કરતા શ્રમને ગતિશીલ કરવા અંગે અઢળક સાહિત્ય ઉપલબ્ધ છે. આ સંદર્ભે કેટલાક પ્રશંસનીય પ્રયાસ પણ થયા છે. સ્વ-રોજગાર મહિલાઓનું મંડળ (SEWA) અને ગ્રામીણ બેન્ક જેવા પ્રયાસોની જગતે નોંધ લીધી છે. પરંતુ આઝાદ હિંદુસ્તાનમાં શારીરિક શ્રમ કરનારની ઓળખ વ્યક્તિ તરીકેની નહીં, માત્ર મજૂર તરીકેની છે. આ મજૂર માટે કોને નિસબત છે? જાણીતા કવિ દુષ્યંત કુમારના શબ્દોમાં, યે જિસમ બોજ સે ઝૂક કર દુહરા હુઆ હોગા / મૈં સજદેમેં નહીં થા, આપકો ધોકા હુઆ હોગા. (લદાયેલા ભારથી શરીર બેવડ નમી ગયું હતું; તમને ગેરસમજ થઈ હશે, પણ હું પ્રાર્થના કરતો ન હતો.)

બે દિવસ પહેલાં આંતરરાષ્ટ્રીય શ્રમિક દિવસ ગયો, પણ તેની ઉજવણી કેવી? શહેરો અને નગરોમાં બાંધકામ, ઉત્પાદન પ્રક્રિયામાં વિના અવાજે કામ કરીને વસ્તીને જીવાડનારા અને સમૃદ્ધ કરી હિંદુસ્તાનને નંબર વન બનાવવા કુલ રાષ્ટ્રીય પેદાશમાં વધારા માટે ગૌરવ અપાવનારા કરોડો હાથ આજે ગલીઓ, ખખડી ગયેલાં ઝૂંપડાં, વણવપરાયેલાં મકાનોમાં સુસ્ત થઈ પડ્યા છે. સવારના છ અને બપોરના ચાર વાગ્યાની ધખતી ધરા પર કોઈ છત્ર કે છાયા વિના અન્ન માટે કતારમાં ઊભેલા શ્રમિકને આ ભોજન બપોરે બાર અને સાંજે સાત કલાકે પણ મળશે તેની કોઈ ખાતરી નથી.

આ સ્થિતિમાં સંડાસ અને નાવણિયાને યાદ કરવાની ધૃષ્ટતા કેવી રીતે કરી શકાય? પાણી અને સાબુથી વારંવાર હાથ ક્યાંથી ધોઈ શકાય, જ્યાં ન પાણી હોય કે ન સાબુ? મજૂર નામની આ પ્રજાતિ પર સમાજ અને સરકાર કોઈ ક્રૂર મજાક તો નથી કરી રહ્યાં ને? આવી નિરાશ પરિસ્થિતિમાં કેટલાક મજૂરો મરણિયા બનીને પોતાનો નહિવત્ અસબાબ અને બાકી બચેલાં નાણાં લઈને મહિલાઓ તથા બાળકો સાથે વતન ભણી પગપાળા નીકળી ચૂક્યા છે. દિલ્હીમાં સાઇકલરીક્ષા ચલાવનારા લાંબી મજલ સાઇકલ પર કાપીને બિહાર જઈ રહ્યા છે. અલબત્ત, કર્મશીલો ખડેપગે છે, પણ તેમાંથી કેટલાને અને ક્યારે તે મદદ પહોંચાડશે?  આપણે ઈન્સાફ સારુ શું કરી શકીએ?

ગૃહ મંત્રાલયની માર્ગદર્શિકા અનુસાર રાજ્ય સરકારોને 3 મે બાદ મજૂરોને તેમના વતનમાં પરત મોકલવા માટેની વ્યવસ્થા કરવા જણાવાયું છે. સર્વશક્તિશાળી કેન્દ્ર અને આટલા 'લોકપ્રિય અને પોલાદી' નેતાને તાળાબંધી જાહેર કરતાં પૂર્વે આ પગલાં લેતાં કોણે અટકાવ્યાં હશે? ત્વરિત અને દૃઢ નિર્ણયકર્તાની છબી બરકરાર રહેવી અનિવાર્ય હોવાથી, તેમાંથી પરિણમતો બોજો સહુએ સમાંતર ભોગવવાનો. પણ કોણ ભોગવશે? નેતાએ તો રૈયતને બજારમાં ધસી વસ્તુઓની સંગ્રહખોરી ન કરવાની જાહેરાત કરી છે, કારણ કે સઘળું પ્રાપ્ય છે! પણ કોના માટે? પૂરતી ખરીદશક્તિ ધરાવતા ધનિક અને મધ્યમ વર્ગ સારુ. મજૂર અને ખેડૂતે જીવવા માટે જાતે લડાઈ કરવાની. વચન પણ અપાયું કે જનધન ખાતામાં નાણાં જમા કરાશે. કેટલાં? કેટલા દિવસ ચાલશે?

નિષ્ણાતોના મતે રોગના પ્રારંભ અને તેના ફેલાવાની તારીખની જાણકારી આધારે કહી શકાય કે સમુદાય સુધી આ રોગનું સંક્રમણ નહોતું થયું. એપ્રિલમાં આ આંકડો ઝડપથી વધ્યો. વતન જવા ઇચ્છનારા વધારાની રેલવે અને બસની મદદથી વતન પહોંચી શક્યા હોત. રાજ્યોનો પણ હકારાત્મક પણ પ્રતિભાવ મળી શક્યો હોત. નાણાંનું હસ્તાંતરણ થઈ શક્યું હોત, પુરવઠા અને આંતરમાળખાકીય વ્યવસ્થા કરી શકાઈ હોત. આવાં આગોતરાં આયોજનમાં નાટકીયતા અને આંચકા ખરાં? ના. પરંતુ રૈયતને ભય અને રહસ્યના ઓથાર નીચે સતત રાખીને સર્વસત્તાધીશ બનવામાં માહેર નેતા રૈયતને આંચકો ન આપે તે કેવું? આંકડા બતાવે છે કે જો સમુદાય સંક્રમણ ન હતું, તો માત્ર ચાર કલાકમાં તાળાબંધીનો અમલ જરૂરી હતો? અલબત્ત, તેના તથાતથ્યમાં ન જઈએ. કારણ તેના વિષે ઘણું લખાઈ અને કહેવાઈ ચૂક્યું છે.

'હરેક મઝદૂર-કિસાન'ને હ્રદયમાં રાખનાર આપણા નેતા ભલે તાળાબંધીનો બોજો સૌને માટે કહે, પણ વાસ્તવમાં તો મજૂર અને કિસાનને જ બોજો વેંઢારવાનો આવશે. જો ગરીબ મજૂરને આજે ચેપ લાગ્યો હશે અને તે રોગનાં લક્ષણો ધરાવતો નહીં હોય; ને જો તે 3 મે પછી શારીરિક અંતર જાળવ્યા વિના મુસાફરી કરીને વતન જશે, ત્યારે તે ગામના વડીલો કે જે અન્ય શારીરિક સમસ્યાઓ પણ ધરાવતા હશે તેમને પણ ચેપગ્રસ્ત કરશે. આ પણ સ્વીકાર્ય સમાંતર નુકસાન ગણાશે.

પાટા પરથી ઊતરી ચૂકેલી અર્થરચનાને પુન: પાટે કેમ લાવવી, તે બીજો પ્રશ્ન. (જો કે ગાડી પાટા પરથી તો કોવીડ-19 પહેલાં જ ઊતરી ગઈ હતી. અલબત્ત, એ મુદ્દો આજે ચર્ચામાં નથી.) ચતુર અમલદારો, અર્થશાસ્ત્રીઓ અને બૌદ્ધિકોમાં આજકાલ તળિયેથી ટોચ (bottom-up) અભિગમ ચર્ચાનો મુદ્દો છે! ઔદ્યોગીકરણ અને શહેરીકરણ વડે આર્થિક વૃદ્ધિ અને રાષ્ટ્રીય પેદાશનો ઊંચો વૃદ્ધિ દર મેળવવાની ઘેલછામાંથી જન્મેલી કેટલીક બાહ્ય અસર સારુ પાછાં પગલાં શક્ય નથી. નુકસાન થઈ ચૂક્યું છે અને રહેશે. 

ગાંધી 150ની ઉજવણી માટેની રાષ્ટ્રીય સમિતિના અધ્યક્ષે સફાઈ અભિયાન શરૂ કરી સારો દેખાવ કર્યો. પરંતુ શું આપણે આટલેથી અટકી જઈશું? સફાઈ મનની પણ જરૂરી. પશ્ચિમે આપેલા આર્થિક મૉડેલના સ્વીકારે હિંદુસ્તાનના અર્થકારણને કઈ સ્થિતિમાં મૂક્યું છે? માનવ અને કુદરતી સંસાધનોની સ્થિતિ કેવી છે? આ સંજોગોમાં સ્વાવલંબન ને સ્વદેશીના બે પાયા પર ગાંધીના સ્વપ્નનું ગ્રામ સ્વરાજ  મેળવવું તે રાષ્ટ્રપિતાને યોગ્ય અંજલિ નથી? વિજ્ઞાન અને ટૅક્નોલૉજીની મદદ વડે સમુચિત શોધખોળ ને તે દ્વારા ગામ અથવા ગ્રામસમૂહના સ્તરે કરી શકાતા ઉત્પાદનનું વ્યવસ્થાપન પણ તે જ એકમ દ્વારા ચોક્કસ થઈ શકે. જળ, જમીન અને જંગલ જેવાં કુદરતી સંસાધનો પાછાં મેળવી શકાય. સ્થાનિક શાણપણ(જ્ઞાન)ની મદદથી ગામનું શ્રમદળ ગામમાં જ રહી ઉત્પાદન કરી શકે. શહેરોમાં સુલભ પાયાની સગવડ ગામને પણ પ્રાપ્ત થાય તો સ્થળાંતરનો દર ઘણો નીચો આવે. અલબત્ત, શરત એ કે માગમાં ઘટાડો થવો જોઈએ. દિલ્હી સ્કૂલ ઑફ ઇકોનૉમિક્સના જાણીતા શિક્ષક પુલિન નાયકે આ દલીલ કરી છે! કોવીડ-19 આપણને રાજનીતિ અને અર્થનીતિમાં પરિવર્તન કરવાની તક પૂરી પાડે છે. જો ગ્રામસભાને રાજકીય સત્તા ને કુદરતી તથા અન્ય આર્થિક સંસાધનો પર માલિકી હક આપવામાં આવે તો કિસાન અને મજૂરનાં ગૌરવનું પુન:સ્થાપન થશે. શ્રમિકોને આથી ઉત્તમ શી ભેટ આપી શકાય?

આપણે સહુ રાહત અને પુન:વસનને ટોચથી તળિયે નહીં, પરંતુ તળિયેથી ટોચ તરફની પ્રક્રિયા ગણતા થયા છીએ, તો રાજ્યકર્તાઓ, અર્થશાસ્ત્રીઓ અને શુભચિંતકોને ગ્રામઅર્થરચનાને સફળ બનાવવા માટેના આયોજન અને અમલીકરણ માટે કોણે અટકાવ્યાં છે?

e.mail : sudarshan54@gmail.com

સૌજન્ય : “નિરીક્ષક” − ડિજિટલ આવૃત્તિ; 03 મે 2020

https://www.thebillionpress.org/articles/2020/05/01/questions-very-different-may-day