પાંચ દીકરાના બાપને કોઈ પૂછે 
તમારે કેટલા દીકરા ?
તો કહે ચાર.
તો પેલા ત્રીજા ને કેમ ભૂલી જાવ છો ?
એવો કોઈ પેટા પ્રશ્ન કરે, તો કહે 
કે, એ કવિ થઈ ગયો છે.

આ હતી 
કવિઓની મજાક ઉડાવવાની 
જૂની જોક. 

આજે કોઈ ત્રણ દીકરાના બાપને પૂછે 
તમારે કેટલા દીકરા ?
તો કહે, બે 
તો પેલા વચલાને કેમ ભૂલી જાવ છો ? 
એવો કોઈ પેટા પ્રશ્ન કરે, તો કહે 
કે, એ તો કોમવાદી થઈ ગયો છે. 

આ જોક નથી‌.

"રામકૃપા", ખાદી કાર્યાલય પાસે, સાવરકુંડલા જિલ્લો-અમરેલી

અજાણ્યાઓ આતંકવાદી હતા, 
અને  જાણીતાઓ  ફસાદી હતા. 

છતાં નોંધ એની છે ઇતિહાસમાં,
બનાવો  ઘણાંએ  વિવાદી  હતા.

પ્રતિબંધને    ક્યાંક    પરવાનગી, 
નશાના  બધે   લોક  આદી  હતા.

નહોતી  રહી  ક્યાં ય  ન્યાયાલયો,
પ્રતિવાદીઓ   સામે   વાદી  હતા.

નહીં સત્યને સત્ય પણ કહી શકે,
એ  ડરપોક અથવા  પ્રમાદી હતા.

"રામકૃપા", ખાદી કાર્યાલય પાસે, સાવરકુંડલા જિલ્લો-અમરેલી

બધા કે’ તે સાચું જૂઠાલાલની જય,
કહે ગામ આખું જૂઠાલાલની જય !

પ્રતિષ્ઠા અને પદ ને પૈસાય આપે,
ને બદલામાં જાપું જૂઠાલાલની જય !

કરી પુષ્પવર્ષા ને બોલાવડાવે,
વિમાનો લડાકુ જૂઠાલાલની જય !

હવે જય શ્રી કૃષ્ણા કહેતી નથી ને
કરે છે એ બાયું જૂઠાલાલની જય !

પ્રથમ કોણ બોલે તો બોલે છે આખર,
અધિકારી બાબુ જૂઠાલાલની જય !

નથી બોલતો આ વખત ચૂંટણીમાં,
એ હારેલ રાજુ જૂઠાલાલની જય !

સૌજન્ય : “નિરીક્ષક”, 01 ફેબ્રુઆરી 2022; પૃ. 15