ખો ખો 

બાકી તો બીજું શું થાય છે ? ખો ખોની રમત્યું રમાય છે.
વાંસળીના કંઠમાં તો ડૂમો ભરાય અને સાંબેલા માલકંસ ગાય છે

હું એને આપું ને ઈ અમને આપે ને એમ જ હાલે છે વહેવાર
એક વાર સમ્બન્ધો રાખવાનું શીખો ને રોજ રોજ ઉજવો તહેવાર
સાચુકલાં ફૂલને તો ખરવું ય પડે છે પણ પ્લાસ્ટિકનાં ફૂલનું શું જાય છે ?
બાકી તો બીજું શું થાય છે ? ખો ખોની રમત્યું રમાય છે.

ઊંચા ઝરુખાને પાયાનું પૂછ્યું તો આખ્ખું મકાન કહે ચુપ
ચોપડિયું છાપીને વેચી નાખી ને તમે વાંચ્યા કરો છો હજી પ્રુફ ?
ક્વોલિટી બોલિટી મારી ફરે હવે રેતીમાં ભીંત્યું ચણાય છે.
બાકી તો બીજું શું થાય છે ? ખો ખોની રમત્યું રમાય છે.

કાબરના કલબલમાં કોયલની વાણીને આપે છે કોણ વળી દાદ ?
સંસદમાં જેમ કોક સાચુકલા સાંસદનો સાંભળતું કોઈ નથી સાદ
સાચું કહું, બોસ, મને આખ્ખી ને આખ્ખી આ સિસ્ટમમાં ખામી જણાય છે
બાકી તો બીજું શું થાય છે ? ખો ખોની રમત્યું રમાય છે.

સૌજન્ય : કવિ કૃષ્ણ દવેના ફેસબુકિયા પાન પરેથી.