ગલીએ ગલીએ ગામે-ગામે અંધાધૂંધી ચાલે છે,
કહો જવું ક્યાં, હર સરનામે અંધાધૂંધી ચાલે છે.
એ માણસને શોધી લાવો, પકડો, એને કેદ કરો,
શાને માટે એની સામે અંધાધૂંધી ચાલે છે ?
થયા કરે છે એની સામે ચાલે છે તે ચાલે પણ,
થયા નથી એવા કંઈ કામે અંધાધૂંધી ચાલે છે.
વચ્ચે મંદિરમસ્જિદ છે, ગુરુદ્વારા છે ને છે દેવળ,
એ બાબત પર ચારોધામે અંધાધૂંધી ચાલે છે.
એકબીજાની સામે જુએ લોકો એવી શંકાથી,
કે અહીંયાં કોનાં પરિણામે અંધાધૂંધી ચાલે છે ?
સૌજન્ય : “નિરીક્ષક”, 01 નવેમ્બર 2021; પૃ. 16
