જપી-જપી ને શાને પજવે, શાનો કરવો ડોળ છે,
પ્રેમથી છેતરાશે, મારો કાનો તો ડફોળ છે.
વકીલ, પાદરી, તબીબ, મોલવી, ગુરુ, ભૂવા;
છે મીઠીમીઠી વાણી તેમાં અર્થ ગોળગોળ છે.
આ બારદાન એવા જેમાં પાવલી પૂરી નથી,
ને ટાપટીપ એવી જાણે પૂરા આના સોળ છે,
છે ચાર દિ’ની જિંદગીને પોણીતો વિતી ચૂકી,
છતાં મટકતી ચાલ જોઈ બંદો ઓળઘોળ છે,
બતાવે છે ફેસબૂકે બાદશાહી ઠાઠ એ;
લપાટ ખાઈને કરેલો ગાલ લાલચોળ છે.
e.mail : sahilkandoi@yahoo.com
