વાત મોડેમોડેથી સમજાય છે
કાળ આવે કાળ પણ બદલાય છે.

ભાગ જ્યાં પણ હાટડી લઈ બેસે ત્યાં
કાણો પૈસો લાખોમાં વેચાય છે.

ભીડ ટાણે ભાગતા ભડવીરની
ખાનદાની ટાકણે પરખાય છે.

પાંખને ગીરે મૂકી પારેવડું  
સોને મઢ્યાં પાંજરે પસ્તાય છે

પૂછતા પંડિત થનારા ના રહ્યા
ભોળા થઇ સૌ કામ કાઢી જાય છે

રોજગારીના હુનર બદલી ગયા
બોલવાથી બોર ક્યાં વેચાય છે.

નૃપની નિર્દયતા પૂજાય ત્યાં
પ્રાણવાયુ પ્રાણઘાતક થાય છે.

e.mail : sahilkandoi@yahoo.com

જપી-જપી ને શાને પજવે, શાનો કરવો ડોળ છે,  
પ્રેમથી છેતરાશે, મારો કાનો તો ડફોળ છે.

વકીલ,  પાદરી,  તબીબ, મોલવી, ગુરુ, ભૂવા;
છે મીઠીમીઠી વાણી તેમાં અર્થ ગોળગોળ છે.

આ બારદાન એવા જેમાં પાવલી પૂરી નથી,  
ને ટાપટીપ એવી જાણે પૂરા આના સોળ છે,   

છે ચાર દિ’ની જિંદગીને પોણીતો વિતી ચૂકી,
છતાં મટકતી ચાલ જોઈ બંદો ઓળઘોળ છે,

બતાવે છે ફેસબૂકે બાદશાહી ઠાઠ એ;
લપાટ ખાઈને કરેલો ગાલ લાલચોળ છે.

e.mail : sahilkandoi@yahoo.com